Thai Phum Holy Bible
Sam 98
A lawkcengnae hoi rungngangnae dawk BAWIPA pholennae la
Kasakkung: panuekhoeh
Oe, BAWIPA koe la katha sak awh.
Bangkongtetpawiteh, kângairu hno hah a sak.
Aranglah a kut hoi kathoung e
kut ni tânae teh a pang toe.
BAWIPA ni a rungngangnae teh a kamnue sak toe.
A lannae teh miphun pueng koe a kamnue sak.
Isarel imthung koe a lungmanae hoi
yuemkamcu lah a onae hah pahnim hoeh.
Talai van pueng ni Cathut rungngangnae teh
hmu awh toe.
Talai taminaw pueng BAWIPA pholen hoi,
konawm laihoi hram awh haw.
La sak laihoi lunghawi awh haw.
Pholen la hah sak awh haw.
Ratoung hoi BAWIPA koe la sak awh.
Ratoung kueng lawk hoi pholennae
la kahawi hoi pholen awh.
Mongka hoi tuki hoi Siangpahrang BAWIPA hmalah,
lunghawicalah hoi hram awh haw.
Talî hoi a thung kaawm e pueng hoi,
talai hoi a thung kaawm e pueng ni
a lawk tâcawt sak awh.
Palangnaw ni a kuttabawng naseh.
Monnaw hai BAWIPA hmalah konawm naseh.
Bangkongtetpawiteh, talai lawkceng hanlah a tho.
Talaivan heh lannae hoi lawk a ceng vaiteh,
suetalah taminaw lawk a ceng han
Thai Phum Holy Bible. Copyright © 2020 Batupuei Christian Fellowship. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.