Sam 96

Ka tho hane lawkcengnae dawk Cathut pholennae la

Kasakkung: Devit

1Oe BAWIPA koe la katha sak awh.

Talai taminaw pueng, BAWIPA koe la sak awh.

2BAWIPA koe la sak awh nateh,

a min teh pholen awh.

Rungngangnae kamthang kahawi teh hnintangkuem pathang awh.

3Miphun pueng koe a bawilennae teh pâpho awh haw.

Tami pueng koe kângairu lah a onae hah pâpho awh.

4BAWIPA teh a len, puenghoi pholen hanelah ao,

Cathut pueng hlak taki hanelah ao,

5Miphunlouknaw e cathut pueng teh ayawmyin doeh.

BAWIPA ni teh kalvan hah a sak.

6A hmalah barinae hoi taluenae teh ao.

A hmuen kathoung koe thaonae hoi meihawinae teh ao.

7Oe, tami pueng hoi imthung pueng,

BAWIPA teh bawilennae hoi thaonae hah poe awh.

8BAWIPA e min teh, bawilennae poe awh.

Pasoung hno sin laihoi a thongma koe tho awh.

9Oe, thoungnae kamthoup laihoi BAWIPA bawk awh.

Talai taminaw pueng a hmalah pâyaw awh.

10Miphun pueng koe BAWIPA ni a uk tet awh.

Talaivan hai kacaklah kangdue sak teh, kâhuen mahoeh.

Ama ni kalan lah lawk a ceng han.

11Kalvan teh lunghawi naseh,

talai hai konawm naseh.

Talîpui hoi a thung e kaawm e pueng

ni hai cairing naseh.

12Law hoi a thung e kaawm e pueng lunghawi naseh.

kahrawng e kaawm e pueng nihai

BAWIPA koe konawm laihoi la sak naseh.

13Bangkongtetpawiteh, ama teh a tho.

Talai taminaw lawkceng hanelah a tho.

Talaivan hah lannae hoi lawkceng vaiteh,

a lawkkatang hoi tami lawk a ceng han.