Sam 94

Tami kalan hanelah kânguenae Cathut

Kasakkung: Panuekhoeh

1Oe BAWIPA Cathut, moipathungnae katawnkung,

Oe Cathut moipathungnae katawnkung, ang haw.

2Talai taminaw lawkcengkung,

thaw haw, ka kâoupnaw hah moipathung haw.

3Oe BAWIPA, tamikathoutnaw teh nâtotouh ne,

nâtotouh ne a lunghawi awh han vai.

4A ngai patetlah lawk a dei awh teh,

a lawk a hram awh teh,

nâtotouh ne a kâoup awh han vai.

5Oe BAWIPA, na taminaw hah a pacekpahlek awh teh,

nange râw hah a rektap awh.

6Lahmainu hoi imyinnaw hah a thei awh teh,

na pa kaawm hoeh e naw hah ouk a thei awh.

7BAWIPA ni hmawt mahoeh,

Jakop Cathut ni hai panuek mahoeh ati awh.

8Maya thung dawk e tamipathunaw,

panuek awh haw,

Nâtuek maw na lungang awh han vai.

9Thainae hnâ kasakkung ni thai mahoeh ou.

Mit kasakkung ni hmawt mahoeh ou.

10Miphunnaw kacangkhaikung hoi

panuenae kacangkhaikung ni panuek mahoeh ou.

11BAWIPA ni taminaw e pouknae

banghai bang hoeh e hah a panue.

12Oe BAWIPA, na kâlawk dawk hoi na cangkhai teh,

na yue e naw teh a yawkahawi e lah ao.

13Tamikathout hanelah tangkom tai hoehroukrak,

runae dawk hoi na kâhat sak thai mahoeh.

14Bangkongtetpawiteh, BAWIPA ni

a taminaw hah hnoun mahoeh,

a râw takhoe mahoeh.

15Hatei, tamikalan koe lawkcengnae ban vaiteh,

a lungthin kalan e pueng ni a tarawi awh han.

16Yonnae kasaknaw taran hanelah

apimouh kai hanlah ka thaw han.

Payonnae kasaknaw taran hanelah

apimaw kai yueng lah kangdout han.

17BAWIPA teh kabawmkung lah awm hoeh pawiteh,

duem onae koe ka hringnae yout kahmat han doeh toe.

18Kangduenae hawihoeh ka tet pawiteh,

Oe BAWIPA, na lungmanae ni na kuet han.

19Ka lung mak pathu navah,

lung na pahawinae ni ka lung ahawi sak.

20Payonnae bawitungkhung,

hawihoehnae phung hai a sak awh e teh,

nang hoi kâhuiko thai han vaimoe.

21Ayânaw hringnae taranlahoi a kâhmo teh,

yonnae ka tawn hoeh naw hah yon a pen awh.

22Hatei, BAWIPA teh ka kânguenae doeh.

Ka Cathut teh ka lungsong doeh.

23A payonnae hah amamouh lathueng phat sak nateh,

hawihoehnae a sak awh lahun nah

koung a tâtueng awh han.

BAWIPA maimae Cathut ni koung a tâtueng awh han.