Sam 79

Isarel khuinae hoi ratoumnae

Kathutkung: Asaph

1Oe Cathut, miphun louknaw teh

nange râw thung a kâen awh teh,

Bawkim kathoung a khin sak awh teh,

Jerusalem hah a raphoe awh toe..

2Na sannaw e ro hah kalvan tavanaw

rawca lah a poe awh teh,

na tami kathoungnaw e moi teh kahrawng sarangnaw a paca awh.

3A thipaling teh Jerusalem vah tui patetlah a rabawk awh teh,

kapakawpkung buet touh boehai awm hoeh.

4Imrinaw ni pathoe e lah ka o awh teh,

tengpam e naw ni na dudam awh teh na panuikhai awh.

5BAWIPA nâtotouh ne na lungkhuek han vai.

Nâtotouh ne na lung roum laipalah, hmai patetlah a kak han vai.

6Nang panue hane ka ngai hoeh e miphun hoi

na min ka kaw ngaihoeh e ram koevah,

na lungkhueknae hah awi haw.

7Bangkongtetpawiteh, Jakop catoun hah a kâphi awh teh,

ahnie hmuen hai a raphoe awh.

8Oe, ayan e payonnae hah kaimouh taran nahanelah pâkuem hanh,

na lungmanae ni karang poung lah na kabawm naseh.

Bangkongtetpawiteh, puenghoi

rahnoum sak lah ka o awh toe.

9Oe rungngangnae Cathut, na kabawm haw.

Bangkongtetpawiteh, na min lentoe nahan lah

na rungngang haw.

Na min kecu dawk ka yonnae hah yonthanae na sak pouh haw.

10Bangkong alouke miphunnaw ni,

nâmouh ahnimae Cathut te, ati awh.

Na sannaw e thipaling phu moi na pathung e hah

ka mithmu vah miphun pueng ni, panuek awh naseh.

11Thongkabawtnaw kâhramnae lawk teh, nang koe phat naseh.

Ka lentoe e na hnotithainae patetlah

due hanlah a pouk awh e hah, hlout sak haw.

12Oe Jehovah, na min a mathoesaknae hah,

ka imrinaw e phai dawk roeroe vah,

let sari touh hoi patho haw.

13Hottelah, nang koe ka pawngpa awh e,

tuhu lah kaawm e na tami kaimanaw ni nang teh

pou na pholen awh vaiteh, pholennae teh,

se pueng koe ka pâpho awh han.