Sam 74

Repcoungroenae koehoi hlout nahanlah kâheinae

Kathutkung: Asaph

1Oe Cathut bangkongmaw na pahnawt vaw.

Bangkongmaw na saring a pânae koe e na tuhunaw

taranlahoi na lungkhueknae hmaikhu a pâyam rah bo vaw.

2Kamkhueng e tamimaya, yampa na ran e,

râw lah na pang e miphun,

na ratang e naw heh pahnim hanh.

3Raphoe tangcoung e hmuen koe tho haw.

Hmuen kathoung dawk e hno pueng hah

taran ni koung a raphoe toe.

4Na taminaw a kamkhuengnae hmuen koe,

na tarannaw teh a hramki awh teh,

mitnoutnaw hah a vo awh.

5Ratu thing ka tâtueng hane patetlah,

cakânaw teh a palik awh.

6Dongdengca dawk bawkim hnonaw hah

amamae cakâ, cakkinnaw hoi a raphoe awh.

7Thoungnae hmuen hah hmai a sawi awh teh,

na min onae hmuen hah a khin sak awh toe.

8Koung raphoe awh sei ati awh teh,

ram thung e Cathut bawknae hmuen pueng hah hmai koung a sawi awh.

9Kaimouh teh mae mitnoutnae ka hmawt awh hoeh toe.

Profet hai awm hoeh toe.

Bangkong han nama aw,

telah kapanuekkung kaimouh koe awm hoeh toe.

10Oe Cathut, bangkongmaw na tarannaw ni na pathoe han.

Taran ni na min pou a pacekpahlek han na maw.

11Bangkongmaw na kut aranglae hah na dâw hoeh vaw.

Bout dâw nateh, ahnimanaw hah koung raphoe haw.

12Bangtelah tetpawiteh, Cathut teh ayan hoi talai taminaw koe

rungngangnae kasakkung kaie Siangpahrang doeh.

13Na thaonae lahoi talîpui hah na kapek teh,

tui thung tuitamnaw e lû hah na khoe pouh.

14Leviathan lû hah koung na khoe pouh teh,

kahrawng kaawmnaw ni ca hanelah na poe.

15Tuikhu hoi palangnaw hah na palang pouh teh,

palangpuinaw hah na hak sak.

16Khodai hoi karum hai nange doeh

Kanî hoi angnae hah na sak toe.

17Talai khori pueng hai thoseh,

kompawi hoi kasik pueng hai thoseh na sak toe.

18Oe BAWIPA, taran ni na pathoe e hoi

tamipathunaw ni na min a pacekpahlek e hah pahnim hanh.

19Oe, na bakhu hringnae heh sarang koe poe hanh.

Ka mathoe e na taminaw e hringnae heh

a yungyoe pahnim hanh.

20Lawkkam hah bari haw. Bangkongtetpawiteh,

talai a hmonae hmuennaw hah rektap lawpnae hoi akawi.

21Oe, repcoungroe e naw heh,

kaya laihoi ban sak hanh.

Mathoe hoi a reikathainaw ni na min pholen naseh.

22Oe Cathut, thaw nateh, na kong hah kangdoutkhai haw.

Tamipathu ni hnintangkuem

na pathoe e hah pahnim hanh.

23Na tarannaw lawk heh pahnim hanh.

Nang na ka tarannaw e ruengruengtinae lawk teh

hoehoe a kampaw e hah pahnim hanh.