Sam 68

Isarel koe hawinae dawk Cathut pholennae

Kathutkung: Devit

1Cathut, thaw nateh tarannaw koung kâkayei naseh.

Cathut kahmuhmanaw teh ama koehoi yawng awh naseh.

2Hmaikhu a kahma e patetlah ahnimouh teh koung kahmat naseh.

Khoilai teh hmai hma lah a kamyawt e patetlah,

tamikathoutnaw teh Cathut hmalah kahmat awh naseh.

3Hatei, tamikalannaw teh lunghawi laihoi

Cathut hmalah konawm awh naseh.

Bokheiyah, puenghoi konawm awh naseh.

4Cathut koe la sak hoi a min pholen la sak awh.

Tâmai dawk kâcuie hateh pholen awh nateh, a min teh BAWIPA,

pholen laihoi a hmalah lunghawi awh.

5Na pa ka tawn hoeh naw e napa, lahmainunaw karingkung,

Cathut teh hmuen kathoung koe ao.

6Cathut ni amadueng kho ka sak e hah imthung a poe teh,

paung e naw hai tawntanae hmuen koe a hrawi.

Hatei, tarankathawnaw teh kenae hmuen koe ao sak.

7Oe Cathut na taminaw hrawi hanelah na tâco teh,

kahrawngum vah hmalah na cei navah, Selah.

8Talai a kâhuet teh, Cathut hmalah kalvan ni kho a rak sak.

Sinai mon teh Cathut hmalah, Isarel Cathut hmalah a kâhuet.

9Oe Cathut nang ni kho thouk na rak sak teh,

na râw taminaw ka patang e hah na kabawp.

10Hawvah na tamimaya teh kho a sak awh.

Oe Cathut, nang ni ka mathoenaw hah na hawinae hoi na kawk.

11BAWIPA ni lawk a dei teh,

hote kong ka dei e tamimaya teh ao.

12Siangpahrang e ransanaw teh a yawng awh teh,

im ka ring e napuinaw ni lawphno a kârei awh.

13Tutakha thung na ka ip nakunghai,

ngun hoi pathoup e bakhu rathei patetlah thoseh,

sui hoi pathoup e rathei muen patetlah thoseh, na o awh han.

14Athakasaipounge Cathut ni siangpahrangnaw a kayei navah,

Zalmon mon dawk e ka pangaw e tadamtui patetlah ao.

15Bashan mon teh Cathut e mon lah ao teh,

Bashan mon dawk monsom moikapap ao.

16Monsomnaw bangkongmaw utsinnae mit hoi na hmaiet awh.

Hetheh, Cathut ni o han ngainae mon lah ao.

BAWIPA teh hawvah pou ao han.

17Cathut e lengnaw teh a thong thong hra hlak moi apap.

BAWIPA teh Sinai mon, hmuenkathoung koe ao e patetlah ahnimouh koe ao.

18Arasangnae koe na luen teh, tami moikapap na man teh,

BAWIPA Cathut teh taminaw koe ao thai nahanlah,

tami koehoi dueng laipalah,

ka taran e taminaw koe totouh poehno hah a dâw.

19Hnintangkuem hnori na ka hlai e Bawipa,

rungngangnae Cathut teh pholen lah awm lawiseh.

20Cathut teh rungngangnae Cathut doeh.

Duenae koehoi hloutnae hai Bawipa Jehovah e doeh.

21Hateiteh, Cathut ni a tarannaw lû thoseh,

yon pou kasaknaw e sam onae lû roeroe thoseh, hmâ a ca sak han.

22Bawipa ni Bansan hoi ka bankhai vaiteh,

ka dungpoung e talîpui koehoi bout ka bankhai han.

23Na khok ni na taran thi coungroe vaiteh,

na uinaw ni hai a palem awh han telah ati.

24Oe Cathut, hmuen kathoung koe na tho e,

ka Cathut, kaie Siangpahrang na tho e hah a hmu awh toe.

25La kasakkungnaw hmalah a cei awh teh,

tumkhawng katumnaw ni a kâbang awh.

A lungui vah tanglanaw ni tâbaw a khawng awh.

26Kamkhueng e maya thung dawk,

Cathut Isarel hringnae a kung,

BAWIPA teh pholen awh.

27Hawvah, cahnoung Benjamin hoi kahrawikung ao.

Judah bawinaw a huinaw ni a kâbang teh Zebulun hoi

Naphtali bawinaw ni a kâbang awh.

28Na Cathut ni na thaonae teh kâ a poe toe.

Oe Cathut kaimouh hanlah na sak tangcoung e patetlah hoehoe thasai sak haw.

29Jerusalem e na bawkim kecu,

siangpahrangnaw ni poehno a sin awh han.

30Lungpum um e sarangnaw hai thoseh, maitotannaw hoi,

maitolanaw hai thoseh, a yue teh, tangka hoi kârahnoum awh naseh.

Tarantuk ka ngai e miphunnaw hah, koung kayei naseh.

31Izip hoi laiceinaw tho awh vaiteh,

Ethiopianaw ni Cathut koe karang poung lah a kut a dâw awh han.

32Talai siangpahrang uknae Cathut koe la sak laihoi

Bawipa pholen laihoi la sak awh. Selah.

33Ayan vah, kalvannaw e kalvan kâcuie koevah,

athakaawme lawk, a lawk roeroe a tâco sak.

34Cathut koe thaonae hah poe awh.

A lawkpuilah, ahawinae hah Isarelnaw lathueng ao.

A thaonae teh tâmai dawkvah ao.

35Oe Cathut, na hmuen kathoung hlak hai takithohnawn.

Isarel Cathut teh a taminaw thaonae hoi hnotithainae kapoekung doeh.

Cathut teh pholen lah awm lawiseh.