Sam 64

Tamikathout repcoungroenae hoi BAWIPA lunghawinae

Kathutkung: Devit

1Oe Cathut, ka phuenangnae dawk, ka lawk na thai pouh haw.

Ka tarannaw ka takinae koehoi ka hringnae na khetyawt lawih.

2Tamikathoutnaw e kâdeikâpannae koehoi thoseh,

Payonnae kasaknaw kamkhuengnae koehoi thoseh, na ngue haw.

3Ahnimouh ni amamae lai hah,

tahloi patetlah a hran sak awh.

4Yonnae ka tawn hoeh e tami hah arulahoi ka hanelah,

lawkthoeumkha pala hoi a nue awh teh,

takinae tawn laipalah vaitalahoi ouk a ka awh.

5Hawihoehnae dawk buet touh hoi buet touh a kâhroecoe awh.

Tangkhek patung hanelah a kâpan awh teh,

apinimouh na hmu han vah ouk ati awh.

6Hawihoehnae hah ma hanelah a pâphue awh.

Ngit a pâphue awh.

Lungthin thung lengkaleng a pouknae teh a dungpoung.

7Ahnimouh teh Cathut ni pala hoi a ka vaiteh,

pouk laipalah hmâ a ca awh han.

8A dei awh e lawk dawk letlang a rawp sak vaiteh,

ka hmawt e pueng ni a yawng takhai awh han.

9Tami pueng ni taket vaiteh,

Cathut ni a sak e doeh tie a pâpho awh han.

Bangkongtetpawiteh, hmantang a sak awh e hah a pouk awh han.

10Tamikalan teh BAWIPA dawk konawm vaiteh,

ama hah a kâuep han.

A lungthin kalan e pueng ni a pholen awh han.