Sam 42

Runae koehoi Cathut dounnae

Kathutkung: Korah capanaw

1Sakhi ni tuisi a doun e patetlah Oe Cathut,

ka hringnae ni nang na doun.

2Ka hringnae ni Cathut, ka hring Cathut hah a kahran.

Nâtuek ne Cathut koe ka pha vaiteh, ka minhmai ka patue van han vai.

3Ayânaw ni na Cathut teh nâmouh ao vâ pou ati awh dawkvah,

karum khodai ka mitphi teh khap laipalah ka rawca lah ao.

4Tamimaya hoi Cathut im rei cei awh navah, konawm laihoi,

pholen la rei sak awh navah,

tamimaya hoi pawi koe rei cei awh e naw hah,

bout ka pouk toteh, ka hringnae heh ka thung vah ka rabawk.

5Oe, ka hringnae bang dawk ne sut na ngam.

Bangkongmaw ka thungvah runae na kâhmo.

Cathut hah ngaihawi haw.

Bangkongtetpawiteh, ama teh ka pholen han rah,

na ka rungngangkung hoi ka Cathut.

6Ka hringnae teh ka lungthung a lungmathoe dawkvah,

Jordan ram, Hermon ram hoi Mizar,

mon koehoi nang teh pou na pouk.

7Na tuitâto pawlawk dawk,

tui kadung hoi tui kadung a kâpan teh,

na tuicapa ka thaw e ni koung na ramuk toe.

8BAWIPA ni khodai lah a pahrennae hah na poe teh,

karum lah pholennae la sak laihoi,

ka hringnae Cathut koe ratoum laihoi ka o.

9Ka lungsong, Cathut koevah, bangkongmaw na pahnim.

Bangkongmaw ka tarannaw ni

na pahuipalam awh kecu dawk

ka lung a mathoe han rah, telah ka dei han.

10Ka tarannaw ni nâmouh na Cathut teh ao telah

na panuikhai kecu dawk,

ka hru koung a khoe awh mue toe telah ka pouk.

11Ka hringnae bangkongmaw na lung a mathoe.

Bangkongmaw ka thungvah, runae na kâhmo.

Cathut hah kâuep haw.

Bangkongtetpawiteh, ama teh ka pholen han rah.

Na kabawmkung hoi na ka damsakkung doeh.