Sam 30

Ratoum patonae yawhawi

Kathutkung: Devit

1Oe BAWIPA na pholen han.

Bangkongtetpawiteh, na tawmrasang.

Ka tarannaw ni na panuikhai hane na pasoung hoeh.

2Oe BAWIPA, ka Cathut, nang koe ka hram teh,

na kabawp teh na dam sak.

3Oe BAWIPA, ka hringnae heh phuen thung hoi na rasa teh,

tangkom dawk ka bo hoeh nahanlah na hring sak.

4A tamikathoungnaw, BAWIPA pholen hoi la sak awh.

A min kathoung pahnim hoeh nahanlah, konawm lawk dei awh.

5A lungkhueknae teh tawkkadek doeh,

a ngaikhainae teh hringyung hane doeh.

Kanae teh tangmin vah a roe. Hatei, amom vah konawmnae a pha.

6Ka tawnta nateh,

ka vout mahoeh toe ka ti.

7BAWIPA na ngaikhainae lahoi,

ka mon teh kacaklah na kangdue sak.

Na minhmai na hro toteh, ka lungrei a thai.

8Oe BAWIPA nang koe ka hram teh,

BAWIPA koe ka kâhei.

9Tangkom dawk ka bo toteh,

ka thi ni bang hawinae maw a tawn.

Vaiphu ni na pholen vaiteh

na lawkkatang hah a pâpho han na maw.

10Oe BAWIPA, ka lawk na thai pouh haw.

Na pahren haw. BAWIPA kabawmkung lah pou awm haw.

11Ka cingounae hah

lamnae lah na coung sak.

12Apout totouh ka bawilennae ni kâhat laipalah na pholen teh, la a sak thai nahanlah,

Oe BAWIPA ka Cathut, a yungyoe hoi konawmnae lawk ka dei han.