Sam 149

Tami kathoungnaw ni BAWIPA pholennae

Kathutkung: Panuekhoeh

1BAWIPA teh pholen awh.

BAWIPA koe la katha hah sak awh haw.

Tami kathoungnaw kamkhuengnae koe

a pahrennae hah pholen awh.

2Isarelnaw ni amamouh kasakkung koe lunghawi naseh.

Zion canunaw ni amamae siangpahrang koe konawm naseh.

3Ahnimouh ni lamtu laihoi

Bawipa min teh pholen awh naseh.

Tâbaw khawng laihoi, ratoung kueng laihoi,

pholen hoi la sak awh naseh.

4Bangkongtetpawiteh, BAWIPA ni

amae taminaw dawk a lungyouk.

A ma ni kârahnoum e naw hah

rungngangnae hoi a kamcu sak.

5Tami kathoungnaw ni a bawilennae dawkvah,

lunghawi awh naseh.

Amamae ikhun dawk lunghawi laihoi la sak awh naseh.

6Ahnimae pahni dawk karasangpoung lah

Cathut pholennae awm naseh.

Ahnimae kut dawk hai,

avoivang kahran e tahloi patuem awh naseh.

7Ahnimouh ni khoramnaw moipathung hane hoi

taminaw reknae thoseh,

8ahnimae siangpahrangnaw hai sumrui hoi pâkhi vaiteh,

ahnimouh thung dawk e bari kaawm e taminaw hah

khok dawk hlong buet hoi pâkhi hane thoseh,

9thut e lawkcengnae hah,

ahnimouh koe pha sak nahane doeh.

Hethateh, tami kathoungnaw pueng koe

kaawm hane barinae doeh.

Hallelujah.