Sam 111

A lannae hoi yuemkamcunae dawk Cathut pholennae

Kathutkung: Panuekhoeh

1BAWIPA teh pholen awh.

Tami kalannaw kamkhuengnae koe, maya um vah,

BAWIPA teh ka lungthin abuemlahoi ka pholen han.

2BAWIPA ni a sak e thaw teh a len.

Ka ngai e pueng ni teh a kamtu awh.

3A tawk e teh bari a kamcu teh, a sungren.

A lannae teh a yungyoe a kangning.

4Kângairu hno a sak e teh a yungyoe panue hanelah a sak.

BAWIPA teh pahrennae hoi lungmanae hoi ka kawi e doeh.

5Ama ka taketnaw hah rawca ca hane a poe.

A lawkkam teh nâtuek hai pahnim hoeh.

6Miphunnaw e râw hah a miphunnaw a poe teh,

a taminaw koe a tawk e thaonae hah a pâpho pouh.

7A kut hoi sak e naw teh lawkkatang hoi lannae lah ao.

Phunglawknaw teh yuem a kamcu.

8Hotnaw teh a yungyoe hoi a yungyoe a kangning han.

Hotnaw teh lawkkatang hoi lannae hoi sak e lah ao.

9A taminaw koe ratangnae hah a patawn teh,

a lawkkam teh a yungyoe a kangning nahanlah, kâ a poe.

A min teh a thoung, taki a tho.

10BAWIPA taki e heh lungang kamtawngnae lah ao.

Kâpoelawknaw katarawinaw ni thaipanueknae kahawi a tawn.

Pholennae teh a yungyoe a kangning.