Sam 101

BAWIPA koe yuemkamcu lawkkamnae

Kasakkung: Devit

1Lungmanae hoi kângingnae la ka sak han.

BAWIPA nang koe pholennae la ka sak han.

2Ka kuep e lamthung dawk lungang lahoi ka hring han.

Oe, nâtuek ne kai koe na tho han vai.

Ka imthungkhu dawk ka thoung e lungthin hoi ka o han.

3Ka mithmu vah hawihoehnae banghai ka tat mahoeh.

Katâlawnaw ni tawksaknae hah ka hmuhma teh,

kai dawk kâbet mahoeh.

4Lungthin longkawinae ni na ceitakhai vaiteh,

hawihoehnae hah ka panuek mahoeh.

5Arulahoi a imri ka pathoe e pueng ka raphoe vaiteh,

a minhmai kâoup niteh,

a lungpouk ka rasang e naw hah ka panguep mahoeh.

6Yuemkamcu e khocanaw teh kai koe ao awh nahanelah, ka khetyawt han.

Ka kuep e lamthung ka dawn e ni kaie thaw a tawk awh han.

7Tami ka dumyen e teh, ka im dawk awm mahoeh.

Laithoe kadeinaw teh, ka hmalah pou awm awh mahoeh.

8Hawihoehnae ka sak e naw hah

BAWIPA e khopui dawk hoi raphoe nahanlah,

tamikathoutnaw pueng teh palang a raphoe han toe.