Cingthuilawknaw 28

1Tamikathout teh apinihai pâlei hoeh eiteh a yawng,

hatei tamikalan teh sendek patetlah a taran ahawi.

2Khocanaw lawkeknae kecu dawk

khobawinaw tuhoitu a kâthung awh,

hatei thaipanueknae hoi panuenae katawnnaw kecu dawk

ram a kangning han.

3Tamimathoe ni tamimathoe repcoungroe e teh

ca hane pek laipalah ka cetkhai e longhotui hoi a kâvan.

4Kâlawk ka cettakhai e ni tamikathout a pholen,

hatei kâlawk ka tarawi ni ouk a tuk awh.

5Tamikathoutnaw ni lannae thaipanuek awh hoeh,

hatei BAWIPA katawngnaw ni bangpueng hai a thaipanuek.

6Tawnta laihoi a khuekhaw awm laipalah hring hlak teh

tamimathoe yuemkamculah kaawm e ahawihnawn.

7Kâlawk ka tarawi e teh a lungkaang e capa doeh,

ka kâso e hoi kamyawng e ni a na pa yeirai a po sak.

8Apung ka cat ni teh kalan hoeh e lahoi hnopai ka tawnta e ni

tamimathoe kabawmkung hanelah a pâtung pouh.

9Kâlawk ka tarawi ngai hoeh e teh a ratoumnae hai panuet a tho.

10Thoenae lam dawk tamikalan lam ka phen sak e teh

ama ni a tai e tangkom dawk a bo han,

hatei toun kaawm hoeh e ni hnokahawi a coe han.

11Ka tawnta e ni amahoima a lungkaang lah a kâpouk,

hatei thaipanueknae ka tawn e tamimathoe ni peng a pâpho han.

12Tamikalan a lunghawi navah kalen e bawilennae ao,

hatei tamikathout a kangdue toteh taminaw a kâhro awh.

13Amae yonae ka hrawk e teh hawinae hmawt mahoeh,

hatei ka pâpho e ni pahrennae a hmu han.

14Takinae pou ka tawn e teh a yawkahawi e doeh,

hatei a lung pou ka patak e teh rawkkahmanae hoi a kâhmo han.

15Mathoenaw kaukkung bawi kathout teh

sendek ka huk e hoi tavom ka hram e patetlah ao.

16Thaipanueknae ka vout e ukkung niteh

rep a coungroe hatei hounlounnae ka hmuhma e ukkung teh

a hringsaw han.

17Tamikathet e teh phuen tangkom koe yawng na lawiseh,

apinihai ngang nahan seh.

18Lam kalan dawk ka dawn e tami teh a hlout han,

hatei lam longkawi dawk ka dawn e teh vaitalahoi a rawp han.

19Laikawk ka thawn e teh rawca moi a tawn han,

hatei ayawmyinlah kaawm e tami teh a mathoe han.

20Yuemkamcu e ni yawhawinae kapap a hmu han,

hatei dongdengca dawk tawnta hanelah

kâcai e teh rek laipalah awm mahoeh.

21Minhmai khet tawnnae teh hawi hoeh,

vaiyei tangen kecu dawk tami kâlawk ouk a tapoe awh.

22Dongdengca dawk tawnta hanelah

kâcai e tami teh thoenae mit a tawn,

bout mathoe han doeh tie pouk hoeh.

23Tami ka oup e hlak teh tami ka yue e ni

a hnukkhu pholennae a coe han.

24A manu hoi a na pa hno ka lawm niteh,

kâtapoenae nahoeh ka tet e tami teh,

karaphoekung e hui doeh.

25Tami kâoup e lungthin ni kâyuenae a tâcokhai,

hatei BAWIPA kâuep e teh a lamcawn han.

26Amae pouknae ka kâuep e teh tamipathu doeh,

hatei lungang lahoi kaawm e teh hlout lah ao han.

27Tamimathoenaw hno ka poe e teh vout mahoeh,

hatei ka roun e tami teh puenghoi thoebonae a hmu han.

28Tamikathoutnaw a kangdue toteh

taminaw amahmawk a kâhro awh,

hatei a rawk awh toteh tamikalannaw a pung awh.