Cingthuilawknaw 26

1Kawmpoi e tadamtui hoi canganae kho patetlah,

tamipathu hoi barinae kamcu hoeh.

2Kamleng rumram e pusu hoi pingpit patetlah,

a khuekhaw awm laipalah thoebo e teh api koehai bawt mahoeh.

3Marang hanelah ruibongpai,

la hanelah kammoumrui,

tamipathu e keng hanelah bongpai teh a kamcu doeh.

4Tamipathu teh a pathunae patetlah pato hanh,

hoehpawiteh ama patetlah na awm payon vaih.

5Tamipathu teh a pathunae patetlah pato,

hoehpawiteh a lungkaang lah kâpouk payon vaih.

6Tamipathu koe lawk ka thui e tami teh

amae khok ka tâtueng ni teh rawknae tui ka net e lah ao.

7Khokkhem e khoktakan a kânging hoeh e patetlah,

tamipathu e pahni dawk cingthuilawk teh ao.

8Tamipathu bari e teh tâyaicung dawk

hluemhluem kawm e patetlah doeh ao.

9Tamipathunaw ni dei e cingthuilawk teh

yamuhri kut dawk ka um e pâkhing hoi a kâvan.

10Bangpuengpa kasakkung lentoe Cathut ni

tamipathu hoi kâtapoe kung aphu a poe.

11Ui ni a palo bout a ca e patetlah tamipathu ni

a pathunae hah a kamnue sak.

12Ama pouknae dawk tamilungkaang lah ka kâpouk e na hmu ou.

Hote tami koehoi hlak teh tamipathu koehoi

ngaihawinae bet aohnawn.

13Tami pangak ni, lam dawk sendek ao,

thongma vah sendek ao telah a ti.

14Tho teh takhang dawk a kâhei e patetlah

tami pangak teh ikhun dawk a kâhei.

15Tami pangak ni rawca a kâyap teh

a kâtu hane boehai ngai hoeh.

16Ka pangak e ni, kahawicalah khopouk thai e tami sari touh hlak

ka lunganghnawn telah a kâpouk.

17Yuengyoe cei lahoi ayânaw e kong dawk ka bawk e tami teh

ui hnâ ka kuen e hoi a kâvan.

18Na pacai e doeh na a tihoi,

a imri ka dum e tami teh,

19hmaito, pala, duenae hoi

ka ka e tamipathu hoi a kâvan.

20Thing awm hoehpawiteh hmai a roum e patetlah,

tamcueklawk deinae awm hoehpawiteh kâyuenae hai a roum.

21Hmaisaan ni hmaisaei a kamtawi sak,

thing ni hmai a kak sak e patetlah,

kâoun ka ngai e ni kâyuenae a kamtawi sak.

22Tamcueklawk teh katuipounge rawca patetlah ao teh,

von thung a kâen.

23Apâhni pâhnan hoi lungthinkathout e tami teh,

talai hlaam ngun hoi pâbing e hoi a kâvan.

24Tami hmuhmanae ka tawn e tami ni a pahni hoi a hro teh,

a lung thung dumyennae hah a hro.

25Pahren lahoi, ati ei nakunghai yuem hanh,

bangkongtetpawiteh a lungthung vah panuettho e sari touh ao.

26A hmuhmanae hah dumnae lahoi ka hrawk nakunghai,

thoenae teh tamimaya ni panuenae koe

kamnue sak lah ao han.

27Tangkom kataikung teh a tai e tangkom dawk a bo han,

talung kapaletkung koe talung bout a kamlei han.

28Laithoe ka dei e ni a rektap e naw hah ouk a hmuhma,

oupnae kaphawk ni rawknae a tâcokhai.