Job 41

1Leviathan hah hradang hoi alawilah pawk na sawn thai han namaw,

rui hoi a lai hah a kam dawk na kawm thai maw.

2A hnawng dawk hnâpacap na pacap sak teh,

Tamboung dawk laikaw na buen sak han na maw.

3Nang koe ka hei vaiteh,

lawk kanemca hoi lawk a dei han na maw.

4Nang hoi lawkkamnae sak vaiteh,

yungyoe okhai hanelah na la thai han na maw.

5Tavaca patetlah ahni hoi reirei na pai han na maw.

Nama e yu lah la hanelah, na pâkhi thai han na maw.

6Na huikonaw ni ama hoi buvennae hah a sak vaiteh,

hno kayawtnaw koe, ama teh a rei awh han namaw.

7Tahroe donghmo hah a vuen dawk a kawi sak vaiteh,

tanga kamannaw hah tahroe hoi a lû dawk a kawi sak thai nahoehmaw.

8A lathueng vah a kut toung nateh, tarantuknae hah pahnim hoeh,

khoeroe bout sak hanh lawi.

9Ama tâ hane ngaihawinae hah a hrawnghrang doeh,

a mithmu vah a tâ thai hoeh e ao han namaw.

10Ama lungtho sak hanelah apihai a lungtang mahoeh.

Hottelah pawiteh, apimaw ka hmalah ka kangdout thai han.

11Kai ni ka patho hanelah apinimaw hmaloe na poe,

kalvan rahim e hnocawngca pueng hah kaie seng doeh.

12A kut khok thoseh, athaonae pueng thoseh,

a takthai a thaonae, a meihawinae hah ka hrawk pouh mahoeh.

13Alawilae a pho hah apinimaw a rading pouh thai han,

a tamboung hru bawk hni touh kâpâbawk e hah apinimaw rek a hnai thai han.

14Apinimaw a minhmai takhang hah a paawng thai han,

takikathopounge a hânaw hah.

15A keng dawk e a pho, a lakepnaw hah a kâoupnae naw lah a o,

mitnoutnae patetlah kacakcalah khan e lah ao.

16Buet touh hoi buet touh khikkâcat teh,

a rahak dawk kahlî hai kâen thai hoeh.

17Hotnaw teh buet touh hoi buet touh koung kâkuet teh,

kapek thai lah awm hoeh.

18A hâ tangawn ni angnae a tâco sak teh,

a mit hah kho nueng kadai e patetlah ao.

19A kâko hoi hmaito angnae a tâco teh,

hmaitali a tangpei.

20A hnawng dawk hoi hmaikhunaw a tâco teh,

moi thawngnae hlaam dawk ka tangdawk e hoi,

ka kang e buruk patetlah ao.

21A kâha ni hmaisaeinaw a kak teh,

a pahni dawk hoi hmaito a tâco.

22A lahuen dawk thaonae ao teh,

a hmalah lungmathoenae hah a len.

23A takthai hoi tharuinaw teh khakkâkuet teh,

kâtahruet thai hoeh e kacakpounge lah ao.

24A lungthin teh talung patetlah a te,

Cakang phawmnae a rahim lae talung patetlah a te.

25A thaw torei teh, athakaawme taminaw ni a taki awh,

a thao e a taki awh dawkvah, ka pathu e patetlah ao awh.

26Ahni koe tahloi ka phat nakunghai tâ thai mahoeh,

pala, tahroe ni hai tâ thai mahoeh.

27Sum hah cakong patetlah a pouk,

rahum hah thingke patetlah a pouk.

28Licung ni yawng sak thai mahoeh,

Talung hoi dêi e hah ahni hanelah teh cakongkung patetlah ao.

29Bongpai hah cakong patetlah a pouk teh,

pala dawk hoi duenae hah koe a panuikhai.

30A vonpui vuen hah kahran poung e hlaam kâbawng e patetlah doeh a o,

tangdong um vah cangkatin e seh patetlah a tabo.

31Ka dungpoung e tui hah hlaam patetlah a tangdo sak teh,

talî kadung poung e hah satuium patetlah a sak.

32A cei tangcoungnae dawk angnae hah a hruek teh,

tami ni a dungpoung ati e tui hah sampo patetlah a pouk.

33Takinae tawn laipalah, sak e lah ao teh,

talai van dawk ahni patetlae awm hoeh.

34Ka rasang poung e hno pueng hah a khet nah,

ahni teh kâoup e catoun pueng dawk siangpahrang doeh telah a ti.