Job 39

1Mon dawk e Atha ca khenae tueng hah na panue maw,

Sayuk ca khenae tueng te na pâkuem thai maw.

2Thapa nâyittouh maw a vawn tie hah na panue thai maw,

a khenae tueng te na panue thai maw.

3A tabo awh teh a ca a khe,

a canaw teh a pâ sak.

4A canaw hah a dam awh teh kahrawngum a roung awh.

A tha ao awh.

5Kahrawng e lanaw hah apinimaw a ngai patetlah a pâ sak.

Kahrawng e la pennae rui apinimaw a rasu.

6Kahrawng hah apie im lah maw ka sak teh,

kahrawngum hah api khosak nahanelah maw ka sak.

7Runae ka kâhmo e khopui a dudam teh,

kahrekkungnaw e hramnae lawk hah noutna pouh hoeh.

8Mon teh a pawngpanae lah ao teh,

hram kanaw hah a tawng awh.

9Savitan ni nange thaw a tawk ngai han na maw,

na saring im dawk a roe ngai han na maw.

10Savitan hah a lahuen dawk laikawk kanawknae laphu hah na thueng thai han na maw.

Na hnuk lae tangkom a paten ngai han na maw.

11A thao poung dawkvah na kâuepkhai maw.

Na thaw hah ahni dawk na patue thai han na maw.

12Na cakang hah im lah a phu hane hoi,

cangkatinnae koe cabong pâkhueng sak hanelah,

na kâuepkhai thai maw.

13Kalauk vâ ni a rathei hah a kâoup nalaihoi ouk a kamphuet,

hatei a rathei hai a muennaw ni lungmanae a tawn maw.

14Bangkongtetpawiteh, talai dawk a tadui a ceitakhai teh,

vaiphu dawk a phu a bet sak.

15Tami ni rakkâbawng lah a coungroe thai,

moithangnaw ni a kâbawng sak thai tie hah panuek hoeh toe.

16A canaw hah a ca hoeh e patetlah puenghoi a rek teh,

a thaw tawk e a hrawnghrang lah ao e hah bang lahai pouk hoeh.

17Bangkongtetpawiteh, Cathut ni lungangnae a lawp teh,

thoumthainae hoi pathoup hoeh.

18A rasangnae koe amahoima a kâtawm toteh,

marang hoi marang dawk kâcui e hah a dudam.

19Marang thaonae hah na poe e na maw,

a lahuen dawk khoparit hoi na pathoup boimaw.

20Samtong patetlah na pakhi thai maw,

ahnie hnawng dawk hoi kacaie lawk teh taki a tho.

21Tanghling hah a khok hoi a kaphai teh, a thaonae dawkvah a nawm,

tarankâtuknae puengcang thung vah karang poung lah a yawng.

22Takithopoung e hah a panuikhai teh, lungpuennae awm boihoeh.

Hoehpawiteh, tahloi taki hoi ban boihoeh.

23A lathueng vah palabom hah poe a kâroe teh, pala hoi tahroe hah poe a kâhlai.

24Takitho e hoi lungkhuek nah laihoi, mongka lawk ni hai kacakcalah kangdout sak thai hoeh.

25Mongka lawk a cai torei teh, awhaw! telah a ti.

Taran kâtuknae hah ahlanae koehoi a hmui lah a thai.

Kahrawikungnaw a hramnae lawk hoi târuetâho lawk a thai.

26Cangkhainae lahoi mataw ni a rathei a kadai teh,

akalah a kamleng thai maw.

27Karasangpoung lah a kamleng teh,

karasangpoung lah tabu a tuk e hah,

nang ni kâ na poe e namaw.

28Lungha dawk kho a sak teh,

karasang e lungha kânguenae rapanim koe ouk a roe.

29Haw hoi a ca hane hah a tuet teh,

a mit ni ahla poungnae koe e hai a hmu thai.

30A canaw ni thi ouk a du awh teh,

kadout e moikong onae pueng koe ao awh.