Job 32

Elihu ni Job e a huinaw a oun

1Job ni amahoima tamikalan a kâti dawkvah, tami kathum touh ni Job pathung awh hoeh toe. 2Hottelah Barakel e capa Elihu, Buz tami Ram catoun Elihu teh pueng hoi a lungkhuek. Cathut hlak amahoima tamikalan a kâti dawkvah, Job koe a lungkhuek. 3Job e a hui kathum touh koehai a lungkhuek. Bangkongtetpawiteh, Job hah na payon atipouh eiteh, bout pathung nahane panuek awh hoeh. 4Ahnimouh teh, ama hlak vah kacuehnawn lah ao. Elihu ni Job koevah lawk dei hanelah meng a ring. 5Elihu ni hetnaw kathum touh e pahni dawk hoi pathung nahan awm hoeh tie hah a panue torei teh, a lung puenghoi a khuek.

6Hottelah, Barakel e capa Elihu, Buz tami ni hettelah a pathung. Kai teh kum kanaw teh, nangmouh teh na kumcue poung awh toe. Hatdawkvah, na taki awh teh, ka pouknae hai ka dei ngam hoeh.

7Kum ni dei naseh, kum moikapap ni

lungangnae cangkhai naseh ka ti.

8Hateiteh, tami e thung kaawm e muitha,

Athakasaipounge kâha hah

panuethainae kapoekung lah ao.

9Tamikalannaw ni hoe lungangnae awm hoeh

kum kacuenaw ni lannae hoe panuethainae awm hoeh.

10Hatdawkvah, na thai pouh awh haw,

kai ni hai ka pouknae ka pâpho han.

11Khenhaw! na lawknaw hah ka thai teh,

dei hanelah ao telah na pouk lahun nah

na panuesaknae hah ka panue toe.

12Kahawicalah na thai pouh haw

lawk ka pathung thai e

Job e a lung pan ka cai sak e, nangmouh thung dawk

buet touh hai na awm awh hoeh maw.

13Lungangnae ka hmu toe, tami nahoeh niteh,

Cathut ni ama teh a tâ han na tet awh payon vaih.

14A lawknaw ni rep na tâdue hoeh

nangmae lawk patetlah ahni teh bout ka pathung mahoeh.

15A lung a pout awh teh, pathung awh hoeh toe,

lawkkamuem ao awh toe.

16Lawk a dei awh hoeh toung dawkvah,

ka ring rah, bangkongtetpawiteh,

pathung toung laipalah duem a kangdue awh.

17Kai ni hai kama hane ka pathung van han,

ka pouknae teh ka pâpho van han.

18Bangkongtetpawiteh, lawk hoi ka kawi teh,

ka thung e muitha ni dei hoeh laipalah,

na awm sak thai hoeh.

19Ka thung lae hah misurtui tâconae

kâko kaawm hoeh e patetlah ao.

Misurtui um katha patetlah kâbawng hane coungkacoe ao toe.

20Ka kâha a tâco thai nahanelah, lawk ka dei han,

Ka pahni roeroe ka ang vaiteh ka pathung han.

21Apipi nakunghai, kapeknae kamnue sak hoeh nahanlah

tami bangpatet hai ka oup hoeh nahanlah ka ratoum.

22Bangkongtetpawiteh, tami oupnae hah ka thoum hoeh,

telah nahoeh pawiteh, kasakkung ni

palang na lat payon vaih.