Job 20

Zophar lawk

1Hahoi Naamath tami Zophar ni a pathung teh,

2Hatdawkvah ka pouk lawi, pathung nahane na poe,

bangkongtetpawiteh, ka thung e lungreithai kecu dawk doeh.

3Tounnae ni na yue e hah ka thai toe.

Ka muitha ni thaipanueknae hoi pathungnae na sak pouh.

4Ayan hoi talaivan

tami ao totouh hoi,

5tamikathoutnaw tânae tueng teh a duem.

Cathut bang lah kangaihoehnaw e lunghawinae teh,

dawngdengca doeh tie hah na panuek awh hoeh maw.

6A kâoupnae hah kalvan totouh a pha teh,

a lû ni tâmai hah ka phat nakunghai,

7A payungpaei patetlah a yungyoe kahmat vaiteh,

ahni kahmawtnaw pueng ni na maw ao telah ati awh han.

8Mang patetlah yout kahmat vaiteh, hmawt mahoeh toe.

Karum e mang patetlah yout kahma e patetlah ao han.

9Ahni kahmawt e mit ni vah hmawt mahoeh toe.

Hoeh pawiteh, hmuen ni hai kuen mahoeh toe.

10A canaw ni tami ka roedeng minhmai kahawi hah tawng awh vaiteh,

a kut hoi hnopai hah bout a bankhai han.

11A hrunaw teh nawcanae thaonae hoi akawi han.

Hateiteh, vaiphu dawk a ikhai han.

12A pahni dawk kahawihoehe a radip.

A lai rahim vah a hro nakunghai,

13Pasoung laipalah a pâkuem.

A kâko dawkvah a hro nakunghai,

14A rawca teh, a vonthung vah a ui vaiteh,

tahrunsue lah a kangcoung han.

15A tawnta e hnopai hah padoun vaiteh bout a palo han.

Cathut ni a von thung hoi a tâkhawng pouh.

16Tahrun sue hah a pahap teh,

tahrun lai ni a ma a thei han.

17Kalawng e palang, khoitui hoi maito sanutui kamkak vaiteh,

ka lawng e hmawt mahoeh.

18A tawk e thaw ni a coung sak han ei,

von paha nahanelah hno mahoeh.

19Karoenaw hah a ceitakhai hoi, a coungroe teh,

Ama ni a sak hoeh e im hah a lawp.

20A lung thung hoi roumnae hah a panue hoeh dawk.

A ngai e hno buet touh boehai cawi mahoeh.

21A ca hanelah a pek e banghai awm hoeh.

Hatdawkvah a nawmnae ni kasaw awm mahoeh.

22A nawm lahun nah kângairu vaiteh,

ama taranlahoi kângairu patawpoung e kut dawk a pha han.

23A von a paha lahun nah Cathut ni

a lungkhueknae hmai hah ahni koe a tha poeh han.

A ca lahun nah a lathueng vah lungkhueknae kho a rak pouh han.

24Sum e senehmaica teh, a yawng takhai han ei,

rahumpala ni pawkkayawng lah a ka awh han.

25Pala teh a phawk, a tak dawk hoi a tâco pouh.

Loukloukkaang e a hmo hah hmue thung hoi a tâco.

Takikatho poung e a lathueng vah a pha.

26Runae pueng teh ama hanelah pâtung lah ao.

Tami ni patawi hoeh e hmai ni be a kak vaiteh,

a im dawk kaawm e pueng ama hoi a kak han.

27Kalvannaw ni a payonnae hah a pâpho han,

talai ni ama hah a taran han.

28A im e hnopainaw hah be kahmat vaiteh,

a lungkhueknae hnin dawk hnokahawinaw

hah tui patetlah a lawng han.

29Hetheteh Cathut koehoi tamikathoutnaw ni a coe hanelah ao.

Cathut ni a coe hane râw a pouk pouh e doeh telah a ti.