Job 15

Eliphaz ni Job yon a pen

1Hahoi Teman tami Eliphaz ni a pathung. 2Hat navah,

Tami a lungkaang ni ahrawnghrang panuenae hoi maw a pathung han.

Kanîtholae kahlî hoi a von a paha sak han namaw.

3Bang patopatang kaawm hoeh e lawk hno lahoi thoseh,

hawinae ka sak thai hoeh e lawk ni a poukkhai han maw.

4Cathut takinae hoi ama koe ratoum e hah na ngang pouh.

5Bangkongtetpawiteh, na payonpakainae ni,

na pahni hah a cangkhai teh, huenghai onae lawk hah na kârawi.

6Kai ni nang yon na pen hoeh.

Na pahni roeroe ni doeh yon na pen.

7Hmaloe poung khe e lah maw na o,

hoeh pawiteh monnaw ao hoehnahlan vah sak e lah na o toung maw.

8Cathut e khokhangnae hah na panue toung maw,

Lungangnae he nang hane dueng lah maw ao.

9Kaimouh ni ka panue hoeh e bangmaw na panue,

kaimouh dawk kaawm hoeh e bangmaw na panue thai.

10Kaimouh thung dawkvah sampo ka po e hoi kacuepoung e,

na pa hlak hai kacuehnawn e ka o awh kaima.

11Cathut ni a dei e lungmawngnae lawk kanem teh

nang hanlah a patawpoung maw

12Bang kecu dawk maw, na lungthin ni na kahmakhai,

bang kecu dawk maw avangvanglah pou na hmaiet.

13Na muitha ni Cathut taranlahoi pou a kamlang teh,

hot patet e lawknaw na pahni dawk hoi na tâco sak.

14Tami teh banglamaw ao teh, a thoung thai han.

Napui ni a khe e teh, banglamaw ao teh, a lan thai han.

15A tamikathoungnaw patenghai,

Cathut ni kâuepkhai hoeh.

A mithmu vah kalvan patenghai thounghoeh pawiteh,

16Panuet ka tho e, kakhin e, payonpakainae hah,

tui patetlah ka net e teh, banghloimaw hoe kathounghoehe la ao han.

17Thaihaw, ka dei vai,

ka hmu e hah ka pâpho han.

18Tami a lungkaangnaw ni ouk a dei e

mintoe koehoi e hmu e hno a hro awh hoeh e hah.

19Ahnimouh dueng a poe e ram,

ram alouknaw a othaihoenae hah.

20Tamikathoutnaw ni a hring na thung patawnae a khang.

Amamouh kum yit touh rep kacuengroenaw koe a hro.

21Takitho e pawlawk hah amamae hnâ ni a thai teh,

hnopai a tawn nah, ka raphoe hane naw ni a thosin awh.

22Hmonae thung hoi kamlang hane hah yuem hoeh.

Bangkongtetpawiteh, ahni teh tahloi ni a ring toe.

23Ca hane tawng hanelah a kâva teh,

nâmaw hote teh ao telah a ti.

Hmonae hnin teh a kut dawk a pha toe tie hah a panue.

24Rucatnae hoi kângairunae ni a lungpuen sak,

tarantuk hanelah coungkacoe kaawm e siangpahrang patetlah tâ e la ao.

25Bangkongtetpawiteh, Cathut taranlahoi a kut a dâw teh,

Athakasaipounge taranlahoi kâoupnae hoi a kâroe.

26Bahling katha poung e hoi, lung ka patak poung e lahoi

Cathut tuk hanelah a yawng sin.

27Athaw ni a minhmai muen a ramuk teh,

a keng thouk kathâw nakunghai,

28kingkadi e khopui dawk kho a sak teh,

apinihai a ohoehnae, kingdi e kho dawk ao.

29Tawnta mahoeh, hoeh pawiteh, a tawnta e hnopainaw kangning mahoeh,

hoeh pawiteh a tawn e hah talai dawk pungdaw mahoeh.

30Hmonae thung hoi tâcawt mahoeh.

Hmaipalai ni a kangnaw hah a kak han,

a pahni dawk e kahlî hoi be a kahma sak han.

31Amahoima a kâdum teh, bang hoeh e hah kâuep han seh,

bangkongtetpawiteh, a tawkphu teh banghai bang nahoeh.

32Atueng akuep hoehnahlan vah, kuep sak lah ao awh vaiteh,

akangnaw hah naw mahoeh toe.

33Misurkangnaw patetlah ka hmin hoeh rae a paw a sarut totouh kahû en vai teh,

Olive thing patetlah a pei hah koung a sarut han.

34Bangkongtetpawiteh, tamikathoutnaw hoi kamyawng e teh,

caici lah ao han. Tadawngnae hoi sak e im teh, hmai ni be a kak han.

35Kahawi hoeh e hah a vawn teh, bang hoeh e hah a khe awh.

A von dawk laithoe a vawn awh telah a ti.