Phungdeikung 1

Bangpueng ahrawnghrang

1Devit capa, phungdeikung Jerusalem siangpahrang ni a dei e lawk teh,

2Ahrawnghrang doeh, ahrawnghrang doeh.

Bangpueng hai ahrawnghrang doeh.

3Kanî rahim vah tami ni a tawksak e pueng

bang hawinae maw kaawm.

4Se buet touh aloum teh se alouke bout a tâco.

Hatei, talai teh a kangning.

5Kanî a tâco teh bout a khup.

Hatei, a tâconae koehoi bout bout a tâco.

6Kahlî haiyah a kâheinae koe lah

bout bout a kâhei.

7Tuipuinaw a lawng teh talîpui dawk koung a kâcu eiteh kawi hoeh.

Talîpui teh a lawngnae koelah bout bout a ban.

8Bangpueng hai tami ni dei thai hoeh totouh patangnae a kâhmo .

Mit ni a khet eiteh hmawt thai hoeh.

Hnâ ni a thai eiteh boum thai hoeh.

9Hno kaawm tangcoung e hai bout kaawm hane hoi a kâvan.

Atu sak e hai bout sak hane hoi a kâvan.

Kanî rahim vah hno katha awm hoeh.

10Khenhaw! hno katha buet tabang ao maw awm hoeh,

ayan vah yo kaawm tangcoung e doeh.

11Ayan kaawm boi e hnonaw ouk pahnim thai awh.

Ka tho hane naw hai ka tho hane naw ni bout a pahnim awh han.

Lungangnae ahrawnghrang

12Kai, phungdeikung, Jerusalem khopui dawk Isarel siangpahrang lah ka o nah, 13Kanî rahim vah sakyoe e pueng thoumthainae lahoi pakhingpalang lungthin ka tawng. Cathut ni taminaw koe khoram sak nahanelah a patangpalai sak. 14Kanî rahim e hnosak e pueng ka hmu toe. Bangpueng ahrawnghrang doeh. Kahlî ka man e hoi doeh a kâvan.

15Ka longkawi e teh palan thai hoeh.

Kamko e hno teh touk mahoeh.

16Kama hoi kama ka kâdei e teh, kai teh Jerusalem kauknaw pueng hlakvah ka talue, ka lung a ang, ka lungthin ni lungangnae hah alawkpui lah a kamtu. 17Lungangnae hoi pathunae, polainae pakhingpalang ka tawn. Hot naw haiyah, kahlî man e patetlah doeh ao. 18Lungangnae apap nah, lungreithainae a pap. Thoumthainae apapnae koe lungmathoenae hoe a pap.