Zephaniah 1

Pakai Thutanna Le Lungsatna

1Amon chapa Josiah in Judah gam’a lengvai apohlaijin, Pakaijin hiche thu hi Zephaniah kitipa heng’a ahin sei tai. Zephaniah chu Cushi chapa, Cushi chu Gedaliah chapa, Gedaliah chu Amariah chapa, Amariah chu Hezekiah chapa ahi. 1 2“Keiman leiset chung’a thil ijakai katheh ngimhel ding ahi”, tin Pakaijin aseiye. 3“Keiman mihem leh gancha katheh ngim ding, chung’a leng vacha ho katheh ngim ding, Twikhanglen’a nga ho jong katheh ngim ding ahi. Migilou jouse abong abaija kalha-a, kaset tup ding, leiset chung’a mihimte kasuhgam ding ahi”, tin Pakaijin aseiye. 4“Keiman kakhut tah’a Judah gam le Jerusalem kasugep ding, chuleh Ba’al doi hou ho jouse, anunung pen geija ka suhgam ding ahi. Keiman milim doi houna thempu ho jouse jong, koiman ageldohkit tahlou ding’a, ka suhmang ding ahi.” 5Ajeh chu ama hon, inting vum’a nisa, lhathah chuleh ahsi ho ahouvun, abohkhup jiuvin ahi. Amaho Pakai nung juijin akiseijun, ahinlah amaho chu Molech Pathen hou joh ahiuve. 6Pakai nung ajui nauva kon’a nungjam kit ho, Pakai jong hol talouva chuleh dong talou ho chu, ka suhmang soh hel ding ahi.” tin Pakaijin aseiye. 7Hatchungnung Pakai angsung’a thipkhen in um'in, ajeh chu tijat umtah Pakai thutanna nikho chu anaitai. Pakaijin amite asutu in, kilhaina gantha ding jong agong’e, chuleh aman amiho jong athensotai. 8“Hiche thutanna nikho chuleh, keiman Judah pipuho leh leng chapa te ho talen kamatsah ding, chuleh milim doihouna a chon ho jouse jong, abon’a talen kapeh ding ahi” tin Pakaijin aseiye. 9Henge, milim doihouna kin’a gapang tapou abon’a gotna kapeh ding, chuleh apupa insung dim’a um’a, pumhat leh duha-a thilbol ho jouse, abon’uva talen kamat sah ding ahi.

10“Hiche nikho niteng chuleh”,

Pakaijin aseijin, “Nga kelkot a pat ka ogin kija ding chule khopi ningli jousea kithong soh ding ahi.”

11Keithela touho lunghem in kap’un, ajeh chu kivei mi ho le sumkol vei mi ho kisumang ding ahi. 12“Meisal kadet’a Jerusalem khopi thimlai jouse kakhol chil ding, chonset muthim noiya touva, Pakaijin thilse hihen thilpha hileh boldeh ponte, tia sei ho gotna kapeh ding ahi. 13Anei agou jouseu kichomdoh jou keiding;

A in jouseu ahom keuva kijam soh ding ahi.

In thah sa jonguleh, chen thei dehlou diu;

Lengpilei lhou jonglehu, lengpitwi adonlou diu ahi.

14“Tijat umtah Pakai nikho chu ahung naiye.

Genthei lilhon kana nikho,

Pasal thahat tah jeng jong kana nikho,

Hunglhung vah ding ahi.

15Hiche nikho, Pakai lungsat kibuhlhah nikho chu – Genthei leh hesoh nasat nikho,

Manthah leh ahomkeova um nikho,

Muthim leh lunkham lungjin nikho,

Muthim lhangkhal le meibol jin nikho,

16Gal lhangsapna le sumkon kimut nikho,

Khopi pal kinokhum leh gal nasatah a kisatna nikho hi ding ahi!

17Pakai dounaa na chonset jeh uva,

Mitcho banga kakimaile sah diu,

Na thisan’u leivui lah a kasunlhah ding,

Chuleh natahsau tol'a among dinga kijam ding ahi.

18Pakai lungsat kibuhlhah nikho tengleh na sanauva jong na dangkauva jong na kihuhhing jou lou diu ahi. Pakai lungsat chun leiset jeng jong avallhun jeng ding ahi.

Aman leiset chung mijouse asuhmanga asuhbeihel ding ahi.