Zechariah 1

Lung Kisih Dia Tepna

1Darius vaipoh kumni le lha get channa Iddo themgao chapa Berechiah chapa Zechariah kom'a Pakai thupeh ahunglhungin hitin aseije. 1 2Napa teu chunga Pakai alunghang lheh jingin ahi. 3Hijeh chun amaho kom'ah chun thaneipen Pakaijin hitin ati, achutileh keijong nangho kom'a kahung kile kitding ahi tin thaneipen Pakaijin aseije. 4Napu napa teu bangin chonhih un, amaho jaha chu themgao hon lhang asap piuve, thaneipen Pakaijin aseijin ase lam'a nachon nauva kon leh thilse na bolnauva kon'in hungkile kit’uvin tin aseije. Ahivangin ama hon angai pouvin khohsah injong anei pouve, tin Pakaijin aseije. 5Napu napa teu chu tua hi hoilam'a um'a hitauvem? Amaho leh themgao ho chu sotpeha thigam'a ahi tauve. 6Ahinlah epi hijongleh kalhachate themgao kom'a kana phondoh ho jouse chu napu napa teu khanglaijin kaseibang-bangin ana guilhung sohtan ahi. Hiche dungjui chun ama hon kisih in alungu ana heijun, Eihon thaneipen Pakaiya kon'in imudiu lom imu tauve, Aman kahin bolding ahi ati dungjuijin ahin tongdoh tan ahi.

Sakol Ho Gaova Amu

7Darius leng chan kumni lhinna shebath lha kehni somni leh ni li channin, themgao Iddo chapa Berachia chapa Zechariah kom'a Pakai thupeh ahunglhungin ahi. 8Keiman phaicham khatnah huisum thing lah a sakol sankhat anadingin achung a pasal khat ana tou chu jan nin gaovin kanamun ahi. Anunglam'a chun sakol asan, abuong chuleh akaang jong ana ummin ahi. 2 9Keiman kakom'a thusei vantil kom'a chun “ka Pakai hiche sakol hoipenhi ipi vetsah naham katin ahileh vantil chun na hetsah nang’e ati. 10Hichun huisum thing lah a ding mipa hin adonbut in, hicheng pihi Pakaijin leiset pumpi khol le dinga asohdoh ahiuve ati. 11Huisum phung lah a ding Pakai vantil kom'a chun sakol chunga tou adang ho chun aseijun, “keihon leiset pumpi ka khollun, leiset chunghi lungmong in aum nauve”atiuve.

Pathen'in Zion Lhembi Ding

12Hiche hi ajah phat in Pakai vantil chu hiti hin ataove. Vo hatchungnung Pakai kum som sagi sung ahi nangma Jerusalem leh Judah khopiho chunga hung lunghanga nahitam, itih chan gei hi amaho chunga khotona na musah loulai ding ham. 13Keikom'a thusei vantil kom'a chun Pakaijin lungmon konna thuchengin ana donbut in ahi. 14Hiti chun kakihoulimpi vantil chun kakom'a hitin anaseijin ahi. Hatchungnung Pakai chun hitin aseije. Keiman Jerusalem le Zion phatna dinghi gelkhoh na leh khotona kanei lheh jingin ahi. 15Keiman tu tua chamna leh lungmonga um namdang ho kom'a kalung ahang lheh jengin kamite chunga vang kaha lunghan pon ahi. Namdang ho hin aha bolset val tauvin ahi. 16Hijeh chun Pakaijin hitin aseiye,keima Jerusalem'a khotona neijin kahung kile tai. KaHou-In kisa phading Chuleh Jerusalem kithah semphat ding ahi. tin hatchungnung Pakaijin aseiye. 17Hatchungnung Pakijin jong hitin aseiye, Israel khopi ho bulhingset a hung kile dohding chutengleh Pakai Zion alung monsahding chuleh Jerusalem'a dinga alahlut ding ahi.

Gao Mit’a Pengkul Amu

18Hijou chun kadah in kavetleh saki li kamui 19Keima eiki houlimpi vantil kom achun hiche hi ipi tina ham tia kadohleh, aman eidonbut in,” hiche saki ho hin chitin namtin lah a Judah, Israel chuleh Jerusalem ana lhocheh a chu ahiuve. 20Chuin Pakaijin thihkheng them mili eivetsah e. 21Amaho hi ipi dinga hung hiuvam tia ka doh leh, vantil chun eidonbut in, hiche saki le nam ho hi Judah te muntinna ana thecheh ana sunem ho chu ahiuve. Tun hiche thihkheng them ho hin hiche nam ho hi kichatsah a sonlhu ding leh sumang dinga hung ahiuve ati.