La Bu 97

Yahweh Pakai Thaneina Le Aleng Vaipoh

1Yahweh Pakai hi leng ahi! Vannoi mite kipah hen! Twikhanglen akimvelle agamla penna um miho jong kipah uhen.

2Ama hi meilhang thim in atomin, chonphatna le thudih chu alaltouna khombul ahi.

3Amasang ah meikong aleng'in akidoupi ho ahallih gamin ahi.

4Akolphe vah in vannoi leiset asalvah'in ahi. Leiset in amun akithing thingin ahi.

5Molle lhangjong Yahweh Pakai masanga khoilu bangin ajunlha jengin ahi. Leiset pumpi Yahweh Pakai masanga hitia hi thilsoh -a ahi.

6Vanhon adih na le akitahna aphongdoh'in namtin'in aloupina amu'uvin ahi.

7Milimsemthu doihou ho jouse, panna bei semthu pathen kiletsahpi hojouse jumle jachat athoh'un ahi, ajeh chu semthu pathen hojouse a-anga kun teidiu ahi.

8Jerusalem in ajauvin akipah un chuleh Judah khopiho jouse jong athanom'un ahi. Ajeh chu O Yahweh Pakai nangma thudih nahi.

9Nangma hi O Yahweh Pakai vannoi leisetna athupipen nahin, semthu pathen ho jouse chunga dopsang'in naumin ahi.

10Nangho Yahweh Pakai ngailuhon thilse nahot bol'un ahi. Aman ami chonphate ahinkho-u ahuhdohjin ahi, chuleh miphalouho thaneina a kon'in ahuhdohjin ahi.

11Michonpha ho vah-in asalvah'in, chuleh milungdih ho akipah jiuvin ahi.

12Koi hileh michonpha ho jouse kipah henlang amintheng chu thangvah'u hen!