La Bu 75

Pathen'in Mikitah Ho Adopsang

Lalamkai pa henga Asaph labol

1O Pathen nangma kahin thangvah e! Yahweh Pakai nangma nailama naum jeh in kahin thangvah uve. Muntin a um mipi ten nathilbol kidangtah ho aphongdoh un ahi.

2Pathen'in asei e, keiman thutanna phat khat kagong e, keiman dihtah a thu katan ding ahi.

3Leiset hi kihot linghenlang mihemte tija jonglehu leiset bulpi tuhchah jingding chu kahi.

4“Keiman mikiletsah ho kagih-in ‘kiletsah datan!’ Migiloulou ho kom'achun, ‘nakhut tumjel hihin!’

5Vanho dounan nakhut tum jel hihin, ahilouleh nahsah loutah in thu seihih in” kati.

6Ajeh chu, leiset chunga koimacha solam a kon hihen lhumlam-a kon hijongleh chuleh gamthip noi a kon hijongleh kihisah tah a akhuttum ajel louding aphai.

7Ajeh chu thutan vaihom-a hi Pathen Ama bou ahin, Ama hin koipen ding doh ding ham ahilouleh koipen lhuding ham gonga Ama bou ahi.

8Ajeh chu Yahweh Pakaijin juphon gimnamtuitoh kihal chu akhut a khonkhat in achoiye. Aman hiche ju chu thutanna mun a sunglut in, hichu migilou chengin adon tei-tei diu adontheng heldiu ahi.

9Hinla keima vangin, Pathen thil bol ho hi ka phondoh jengding; Jacob Pathen henga vahchoila kasha jingding ahi.

10Ajeh chu Pathen'in asei e “Keiman miphalouho thahatna lai chu kasuhchip ding ahinla michonphaho thahatna kahatsah beding ahi” ati.