PATHEN LEKHABU THENG
La Bu 66
Pathen Natoh Thilbol Kidang Ho
Leiset mite jousen Pathen vahchoi cheh uhen!
Amin loupi chu vahchoilan saohen! Aloupina ji vannoi a sei leu vin.
Pathen henga sei in, “Na thilbol ho hi iti hoia lamdang hitam! Na melmate jeng jong na thaneina thupitah masang a akun jeng uve.
Leiset chung thil jouse jong na angsung a dilsu cheh untin, nathangvahna la asahdiu, naming hi thongjenju a asahdiu ahi.”
Hung in lang ven Pathen'in ipi atohdoh hitam, mipite dia itobang thil kidang atohdoh hitam!
Aman twipisan a jong lamgolai asemin, chule amite chu akeng'uva ache galkai ui. Hea chun eiho Ama ah ikipah un ahi.
Ajeh chu Aman athahatna thupitah a chun tonsot in vai ahom e. Aman namtin vaipi chaloh sinsah aboncha ave lhisohkei in; koimacha Ama dounan hung kon da jeng hen.
Vannoi leiset mihemte jousen I-Pathen'u Pathen thangvah cheh u henlang avahchoina la choh jejun sauhen.
I hinkhou hi Ama khut a um ahin, Aman ikipallouna diuva ikeng u eituhpeh u ahi.
O Pathen neipatep tauve; dangka banginneisuhtheng tauvin ahi.
Na thangkol a neimat u ahitan chuleh ka tungtun uva sohchanna pohgih chu neipoh sah u ahitai.
Ka chunguvah midang ho lam na jotsah in hiti chun keiho meilhum leh twisohlah neipal galkaisah uvin, hinla neh ding nenna mun a neipuilut tauvin ahi.
Tun nahenga kakitepna subulhit din pumgo thilto pum in na Hou-In ka hinjon e.
Henge, lunggim le kakhoisat nikho hoa nakom'a kitepna ka na nei chu ahi.
Hijeh a chu keiman kanei ho lah ka kelngoichalho hi namtui pen ding le, ka bongchalho le ka keltahchalho hi pumgo thilto a ka hin todoh ahitai.
Pathen gin le jana neijouse hungun lang ngai un, Yahweh Pakaijin ipi eibolpeh am na seipeh ung ka te.
Ajeh chu keiman Ama thangvah pum in panpi thumnan ka tao in ahi.
Keiman ka lunsunga um ka chonset phongdoh lou hile Yahweh Pakaijin ka taona eingaipeh louding ahi.
Hinla Pathen'in eingaipeh e! Aman khohsah tah in ka taona eingaipeh in ahi.
Ka taona eigelkhohpehjeh le ami ngailutna longlou kei a kon a eilahdohpeh lou jeh in Pathen chu thangvah in um hen!
PATHEN LEKHABU THENG. Copyright © 2020 Chongthu Bible Translation Team. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.