La Bu 54

David In Pathen'a Kon Panpina Atahsan

Ziphat ten Saul jah a “David hoi a kisel ham kei hon kahetauve” tia ahung sei jou uva David in tumging to thoa sah dia alabol.

1O Pathen thaneitah in hung'in lang neihuhdoh in! Na thahatnan nei veng'in.

2O Pathen ka taona ngaijin, ka thumna hi neihin gelkhoh peh'in,

3Ajeh chu gamdang mite'n eihin delkhum uvin, mi engse ten tha dingin eihol'un ahi, ama hon Pathen imachan agel pouve.

4Ahinlah kei dingin Pathen hi eipanpi ahin, Yahweh Pakai hin eihinghoi ahi.

5Ka galmi ten thilse agon jouse'u hi amaho chunga le chuh hen! Na dei dan tah in achung uva na tong'in lang amaho khu subei in.

6Keiman naheng a kiphal tah in thilpeh hinchoi ing e; Keiman namin hinthang vah ing kate Yahweh Pakai, ajeh chu hichu apha ahi.

7Ajeh chu Yahweh Pakai nang'in ka hesohna a kon'in neihuhdoh tan, ka gal mite chung'a jong galjona neimusah tan ahi.