PATHEN LEKHABU THENG
La Bu 47
Pathen Hi Leiset Pumpi Lengpa Ahi
Lalamkai pa henga korah chapa te labol
Mijouse hungun! Nakhut benguvin! Pathen kom'a kipah tah in thangvahna sam un!
Ajeh chu Yahweh Pakai Hatchungnung chu gimneitah ahi. Ama hi leiset chunga leng thupitah ahi.
Aman imasang uvah namtin vaipi hi asonkun in eidougalteu jong ikengto noi uvah eikoipeh tauve.
Gamtep gam chu, angailut Jacob chilhahate, kithang-at tah a kijot eiho lodinga alhen ahi.
Pathen chu gimnei tah in akal tou in, Yahweh Pakai chu sumkon gin kithong pum'in akal tou in ahi.
Pathen thangvah la sauvin, thangvah la sauvin; ilengpau thangvah la sauvin, thangvah la sauvin!
Ajeh chu Pathen hi leiset chung pumpi chunga leng ahi lasah pum'in thangvah un.
Pathen alaltouna theng chunga atou in namtin vaipi lah a vai ahom'e.
Vannoi leiset vaihomte Abraham Pathen mitetoh atoukhom'un ahi, ajeh chu leiset chunga leng jouse hi Pathen'a ahi. Ama hi vannoi leiset chung muntin'a jana achang'in ahi.
PATHEN LEKHABU THENG. Copyright © 2020 Chongthu Bible Translation Team. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.