La Bu 20

Galjona Dinga David Taona

Lalamkai pa dia David Labol

1Na hahsat nikhon Yahweh Pakaijin nakana taona nadonbut hen. Jacob Pathen min chun thilse jousea kon'in nahoidoh hen.

2Aman aHou-Intheng a kon'in kithopina nahin pejing henlang Jerusalem a kon'in nahin hatsah jinghen.

3Pathen'in namaicham thilto ho hingeldoh jinghen lang chuleh napumgo thiltoho jong khotona in nahin vetpeh jinghen.

4Pathen'in nalunga nangaichat nape henlang nathilgon jouse nalolhinsah sohkeihen.

5Nagaljona thu kajah tengu leh kipah'a kasapdiu ahi, chuleh Pathen ka Pathen u min'a galjona ponlop kadopsangdiu ahi. Yahweh Pakaijin natao na jouse donbut jing hen.

6Tun keiman athaonu lengpa chu Yahweh Pakaijin ahuhdohji ti ka hetai. Aman avan mun thenga kon a ahin donbut ding, chuleh athahatna nasatah a chu ahuhdoh ding ahi.

7Namtin vaipi abankhat chun a sakol u leh sakol kangtalai hou akiletsah piuvin, ahin eihonvang Yahweh Pakai, eihon Pathen u minbou ikiletsahpi diu ahi.

8Namtin vaipi ho hi hunglhu'u vintin chip lhadiu ahi, ahinla eihovang idindoh diu chule dehtah a idin diu ahi.

9Kalengpau chu galjona pe'n, O Yahweh Pakai! Panpi ngai a kakana neidonbut tei in.