La Bu 16:11

Hoidohna Dinga Pathen Henga David Ajam

David Michtam (Lakai jatkhat)

1Neihoibitnin O Pathen: ajeh chu nangahi kinem jing kahi.

2O Kalhagao, nangman Yahweh Pakai kom'a Nanghi ka Pakai nahi nati, thilpha kaneijouse hi nanga kon bou ahi;

3Leiset a Pathen lhentumte hi pachat umtah ahiuvin, amaho hi keidinga kagal lamkai le kakipa thanop napen ahiuve.

4Pathen dang ho nung jui a delle ho chu alung khamnao kibejing ding ahi. Amaho thisan a kilhaina ganthat a pang ka hilou ding, a pathen nu jong kahoupeh loudiu ahi.

5Yahweh Pakai hi ka chan ding gou le ka phatthei channa khon chu ahi. Yahweh Pakaijin ka ijakai eichintup peh e.

6Nangin neipeh gam jonghi gamphapen ahi, itobanga goupha kidang neipeh hitam!

7Ijakai eihilla ka Yahweh Pakai chu keiman thangvah inge; janteng jong le avel in eigeldoh sah jin eihil jie.

8Yahweh Pakaijin eiumpi danhi keiman hetna kanei jinge. Ama hi kakom'a naichakhatna um ahi ti kahen hijeh chun keima lungthomhao ponge.

9Hijeh hin keima kalung amongsellin chuleh kipanan kadimmin Pathen ka thangvah e.

10Ajeh chu nangin thina mun a neidalha pon natin namitheng te jong lhankhuh a lhahlutsah pon nate.

11Nangin hinnalampi chu neimusah'in natin, neiumpi jal a kipana le nei umpina tonsot nopna chu nei pen nate.