PATHEN LEKHABU THENG
La Bu 146
Thil Adih Jenga Abol Jeh a Vahchoina
Yahweh Pakai vahchoijun! O kalhagao Yahweh Pakai vahchoi jin!
Kahin laisea Yahweh Pakai kavahchoi ding, hinna hu kanei laisen ka Pathen vahchoi la sange.
Leng chapa te chunga na tahsan koi hih'in, hichu panpi bei ahi bouve.
Mihem chate hu abei tengleh leisetna akilekit-un leivui akisoh jin, hiche nikho lechun athilgon chengseu toh thi thading ahi tauve.
Hinlah apanpi dinga Israel Pathen neiho, chule Yahweh Pakai, Pathen a kinepna neiho anunnom ahi.
Aman van le leiset twikhanglen leh asunga um jouse anasemin, Aman imatih chan'a akitepna achepi jing ahi.
Aman suhgentheija umho thudih'in achungthu atanpeh in, chule agilkel te an apen ahi. Yahweh Pakaijin songkul tangho alhadoh'in, achamlhat sah jin ahi.
Yahweh Pakaijin mitchoho kho amusah'in, alhu ho aphong dingin, michonpha Yahweh Pakaijin angailun ahi.
Yahweh Pakaijin gamdang miho ahuhdoh in, Aman meithaiho leh chaga ho akhoton, amavang miphalou ho thilgon asuhbei peh'in ahi.
Yahweh Pakaijin tonsotna vai ahomding ahi. O Jerusalem, Ama hi akhang akhanga na Pathen hi ding ahi. Yahweh Pakai vahchoijun!
PATHEN LEKHABU THENG. Copyright © 2020 Chongthu Bible Translation Team. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.