La Bu 14

Mihem Ngolna David In Ahilchet

Lalamkai pa dia David Labol

1Mingol'in bou alungthim in “Pathen aumpoi” ati. Amaho hi lepche ngen ahiuvin, chule athilbol ujong adihlou jeng ahin, khatcha jong thilpha bol aum pouve.

2Yahweh Pakaijin van'a kon'in lei mihemte jouse ahinven, mikhattou aching tahbeh um-em, chule Pathen ngaicha'a hol-a um-em atin ahi.

3Hinlah aumpoi, abon'un aki-heimang gam tauve, abonchauva lepche ngen ahiuvin, koimacha apha aumpoi khatcha jong aumpoi.

4Setna bolten hetna anei lou u hintem? Amaho hin kamite changlhah bangin aneuvin, Yahweh Pakai komin la taoding agelpouve.

5Amaho hi tijatnan alodim diuahi, ajeh chu Yahweh Pakaijin athua nung ho aumpin ahi.

6Migilou ten bolgentheija umho tohgon asuhsetpeh jiuvin, ahin Yahweh Pakaijin amite ahuhdoh jingin ahi.

7Zion molsang a kon a Israel huhdoh dinga koi hung ding ham? Yahweh Pakaijin amite aki-ledohsah kit teng, Jacob in kipana asap phon a, Israel in Pathen athangvah ding ahi.