PATHEN LEKHABU THENG
La Bu 137
Babylon Gam'a Sohchang Ho Lung Hemna
Jerusalem kageldoh phatnun Babylon vadungpang a chun katou un kakapgam tauve.
Keihon kasemjang hou chu mong thingbah chung dunga chun kakhai un ahi.
Hikom'a chun soh a eihente hou chun la sah-sahding eigouvin, chuleh eisugenthei hou chun kipahtah a la sahsahtei ding eigouvin, “Jerusalem la ho chu khatpen beh neisahpeh'un” atiuve.
Ahinlah keihon hetkhahlou mi gamsunga hi Yahweh Pakai la ho chu iti kasahdiuham?
Vo Jerusalem nangma kasuhmil uleh kakhut jetlam hin semjang pehdan sumil jenghen.
Nangma kageldoh louva, Jerusalem chu kakipana sangpen sang a thupi a kagel lou le, ka leihi kadang chungah behden jenghen.
O Yahweh Pakai Babylon sepai ten Jerusalem alonkhum niuva Edom mite thilbol chu geldoh tei in, “Sumang jengin,” “Toltoh sumat jengun” tin asam un ahi.
O Babylon, nangma nakisu mang ding ahi. Nangin neibol nao bang banga na lethuh penpen chu anunnom ahi.
Nachapangteu puimang a songpi chunga sepgoiho chu nunnom hen!
PATHEN LEKHABU THENG. Copyright © 2020 Chongthu Bible Translation Team. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.