Minbu 1

Israel chate min kilah masat pat

1Israel ten Egypt gamsung ahin dalhah kal u kum khat ahung lhin chun Pathen'in Sinai gamthip a Houbuh a chun Mose ahoulimpi tan ahi. Hichu alhani channa nikho masapen ni ahin, Pakaijin hitin aseipeh e, 2“Israel namsung pumpi a kon'in aphung cheh uva kon a gal hangsanho leh a insungmi hou min jouse aumden dingin jihlut cheh in. Pasal ho jouse chu jihlut soh hel in 3kum somni apat chunglam gal boltheiho jouse chu nang le Aaron'in amin u na jihlut tei-tei lhon ding, 4chuleh hiche phungho jouse lah a kon a chu lamkai khat cheh in nangma na kithopi ding ahi. 5“Hiche phungho a kon a lamkai ho hi na kithopi ding ho chu ahiuve.

Phung

Lamkai

Reuben

Shedeur chapa Elizur

6Simeon

Zurishaddai chapa Shelumiel

7Judah

Amminadab chapa Nahshon

8Issachar

Zuar chapa Nethanel

9Zebulun

Helon chapa Eliab

10Ephraim son of Joseph

Ammihud chapa Elishama

Manasseh son of Joseph

Pedahzur chapa Gamaliel

11Benjamin

Gideoni chapa Abidan

12Dan

Ammishaddai chapa Ahiezer

13Asher

Ocran chapa Pagiel

14Gad

Deuel chapa Eliasaph

15Naphtali

Enan chapa Ahira

16Amaho hi japi lah akon a kilhengdoh lamkai cheh, apu apa phung kailhah a pat lamkaiho chuleh Israel te phung ho a konna mi upa cheh ahiuve.” 17Hichun lamkai kilheng doh chengse chu Mose le Aaron in akou khom lhon'in, 18hiche nikho ma-ma chun Israel te jalhang pumpi jong akhom tup lhon'in ahi. Mipiho jouse chu ama-ama phung leh insung cheh kailhah a kon'in amin akijihlut cheh in ahi. Pathen'in Mose athupeh bangin, Israel pasal kum somni apat chunglamse chu khat khatnin akijihlut in ahi. 19Hiti chun Mose in amaho min jouse Sinai gamthip lai mun a chun ana sutup sohkeijin ahi. 20-21Ama-ama phung dungjui cheh a amin u kijihlut banga pasal kum somni apat achunglam galsat a konthei amijat ho chu hicheng hi ahi.

Phung

Mijat

Reuben (Jacob chapa tahpen)

46,500

22-23Simeon

59,300

24-25Gad

45,650

26-27Judah

74,600

28-29Issachar

54,400

30-31Zebulun

57,400

32-33Ephraim (Joseph chapa)

40,500

34-35Manasseh (Joseph chapa)

32,200

36-37Benjamin

35,400

38-39Dan

62,700

40-41Asher

41,500

42-43Napthali

53,400

44Israel phung som le ni lamkaiho toh Mose le Aaron in akhumlut u pasal ho cheng hi abonchauva ama-ama phung chilhah dungjui cheh a kikhumlut cheh ahiuve. 45Amaho chu ama-ama insung duijui cheh a kikhumlut ahiuve - Israel te pasal kiti pou kum somni apat chunglam gal bolthei jouse hi abonchauva a insung dungjuiya kijihlut cheh ahiuve. 46Amaho chu agomma 603,550 ahiuve. 47Ahinlah hiche kisim khomna a hin Levi te vang apang pon ahi. 48Ajeh chu, Pathen'in Mose kom'ah hiti hin ana seiyin ahi, 49Min najihlut teng Levi te hi najihlut loubeh ding, Israel mite lah a nasim tha loubeh ding ahi. 50Kikhop khomna ponbuh le aki mangcha thil ho aboncha a Levi te mopohna napeh ding, nachena chan uva Ponbuh le amanchah chengse aboncha ama hon apoh uva, akimvella ngahmun sem toh thoa alhacha a pang ding ahiuve. 51Kikhop khomna ngahmun chon phat alhin teng, Levi chapa te chengin aphet lhah diu, hitia chu ngahmun nalhun tengu leh ama hon athah sondoh kit diu, amavang koi hileh phalna beiya kikhop khomna ponbuh ganailut behseh chan chu thi ding ahi. 52Phung jousen ama-ama insung ponlap cheh utoh ngahmun akisem diu ahi. 53Israel pumpi chunga Pakai lunghan louna dinga Levi chapa ten vang kitepna ponbuh kimvella ngahmun akisem cheh uva avetsui diu ahi. Hitia chu hiche ponbuh ventupna chu Levi te mopohna hi ding ahi. 54Hiti chun Pathen'in Mose henga athupeh bang tah chun Israel chaten imajouse abol tauvin ahi.