Micah 4

Zion’a Pakai Vaihomna

1Ninunung leh Pakai Hou-In molsang hi molsang jouse lah a asang pena hung kitung doh ding, vannoi pumpia dinga munpipen hung hi ding ahi. Hiche molsanga chu mitin vaipi hung long khoma Pathen ahou khom diu ahi. 2Namtina konna mipite hung kikhoma asei diu, “Hungun Pakai molsang a kaltou uu hitin Jacob Pathen henga chun. Hiche mun'a chu aman lampi eihil dingu chule aman eihilnao lampia chu ichediu ahi. Chutengleh eihon jong Pakai lampi semsa dung’a iche theidiu ahi. 3Pakaijin namtin vaipi kaha chamna asem ding, chutengleh mihon a chemjam’u tucha-a akikhen uva, atengcha’u jong kang kuija akikhendiu, namkhatin namkhat douna- a chemjam alap louhel diu ahitai. 1 4Mitin chamna le lungmona-a khosadiu, miho jousen ama-ama lengpi gui limnoi le theichang phung noija nomsa tah a hinkho amandiu, kichatna mong-mong umtalou ding, Van'a konna Pakai galmihon atepsa ahitai. 2 5Akimvelluva mitinin ama-ama doihou cheh-u Pathen'in houjong leu, Eihon vang Pakai I-Pathen- u atonsot atonsot geija ijui jing diu ahi.

Khonung’a Zion Galjona Ding

6Hiche nikho ahunglhun teng tah chuleh “A elbai jouse kakhop khomsohkeija, min adelmong jouse jong kakhopkhom ding chuleh keiman kasuh lhaset jouse jong kakhopkhom dingu ahi. 7Koitobang alhasam jouse jong kakihin sosah chehdiu, migama kikai mongsa ho jong namlen ka sosah ding ahi. Chuteng keima Pakaijin tonsot geija Jerusalem'a lengvai kapoh ding ahi.” 8Nang Jerusalem chanu, Pathen mite chenna, leng vaipohna thaneitah nei, na vaihopna hung kile kitding ahi, nangman tamtah Jerusalem. 9Ipi bolla tua hi genthei tah’a kap nahim? Na lamkai ding leng naneilou hitam? Na michingho thigama hitam? numei naosonat in aphah banga na nahi hitam? 10Vo Zion chanu, numei naoso nat in aphah-a athohlal banginkipeh le le jengin. Ajeh chu tua hi nangman khopi hi nadalhah ding ahitai, gangtah a gamla tah a Babylona nakikai mong ding ahitai. 11Tua hi namtin vaipi nangma doudinga hung kikhom ding ahitai. Ahinlah hia chun Pakaijin naveng intin, nagal mite-a kon'in nahuhdoh nante. 12Ahinlah ama hon Pathen lunggel le athilgon ahepouve. Pathen'in ipibolla amite asuh gentheija, ajepma akhoptup kit ham ti hi, hiche nam miten ahetheipouve. 13Kipatdoh inlang nam ho hi suchip in, O Jerusalem Keiman thih saki ho leh sum-eng chaokol kapeh ding nahin, nam tampi ahel hella navoh chip ding ahi. Nangman agou anei hou amansah hou chu Pakai angsunga napeh lut kit ding ahi.