PATHEN LEKHABU THENG
Joshua 12
Mose’n Anajo Lengho
Israel ten ana thagam uva agam'u ana lahpeh u Jordan vadung solam’a cheng lengho chu hiche ho hi ahiuve. Agam lah uchu Arnon vadunga konna Hermon Mol chan ahung kijedoh in, Jordan phaicham solam gamkaise jong ahopmin ahi. 1
Heshbon’a cheng Amor mi Sihon lengpa jong chu ana jouvun ahi, ama lenggam chu Arnon vadung geichin'a um Aroer jong ahopmin, hiche chu Arnon vadung akim'a konna Jabbok vadung gei ahin hiche hi Ammon mite gamgi melchihna chu ahitai. Sihon thaneina in Jordan phaicham solam gamkai Galilee twilen sahlanga konna Chitwilen chan gei ahopmin, Beth-jeshimoth leh Pisgah lhanglang jong ahoppha'n ahi.
Bashan Lengpa Of, Rephaim mite lah a achana chu Ashtaroth le Edrei a acheng'e. Ama hin Hermon Molsang pumpi chung leh Salecah gammang toh, chuleh Bashan gamsung se-se chunga vaihom'a ana panga Geshur mite leh Maacah mite gamgi geija ana pehtha ahin, chutengleh Gilead gam kehkhat chunga jong vaihom'a, Heshbon lengpa Sihon gamgi geija vai anahom ahi.
Pakai lhacha Mose le Israel chaten hiche leng teni hi akisatpi uvin ajou tauve, hichea hi Pakai lhacha Mose in amani gamsung pumpi chu Reuben chate leh Gad chate chuleh Manasseh phung kehkhat chenna dia anapeh ahi. 2
Joshua Lamkai Na A Anajo Leng Ho
Jordan vadung gal nilhumlam Lebanon phaicham Baal-gad kiti laiya patna Seir niso lam'a hung kikhangdoh Halak Molsang geija Joshua leh Israel chaten asatgam uva Joshua’n agam jouseu Israel phung mite chenna dia ana pehdoh agamnei lengho chu hicheng hi ahiuvin, agam hop mong hi thinglhang gamsung jong, phaigam jong, jong molken suhse jong, Judea gamthip sung jong, Negev gamsung jong ahin, Hit mite, Amor mite, Canaan mite Periz mite, Hivi mite chule Jebus gamsung se-se chu ahi. Hiche leng ho hi Israel in ajo ho chu ahi:
Jericho lengpa
Bethel khopia kom'a Ai lengpa
Jerusalem lengpa
Hebron lengpa
Jermuth lengpa
Lachish lengpa
Eglon lengpa
Gezer lengpa
Debir lengpa
Geder lengpa
Hormah lengpa
Arad lengpa
Libnah lengpa
Adullam lengpa
Makkedah lengpa
Bethel lengpa
Tappuah lengpa
Hepher lengpa
Aphek lengpa
Lasharon lengpa
Madon lengpa
Hazor lengpa
Shimron-meron lengpa
Acshaph lengpa
Taanach lengpa
Megiddo lengpa
Kedesh lengpa
Carmel a Jokneam lengpa
Naphot-dor gam'a Dor lengpa
Gilgal a Goyim lengpa ahin,
Tirzah lengpa.
Abon bonin, leng somthum le khat chu ana jouvin ahi.
Source notes (2)
- Cross-reference Minbu 21:21-35; Danbu Ni Na 2:26—3:11
- Cross-reference Minbu 32:33; Danbu Ni Na 3:12
PATHEN LEKHABU THENG. Copyright © 2020 Chongthu Bible Translation Team. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.