Job 7

1“Mihem jouse hinkho hi hahsatna toh kidel jing hilou ham?

Ihinkho uhi kitha lah khut tobang ahin,

2liim ngaicha aum natong mi tobang ahin,

soh atohna man ngah tobang ahi.

3Keima, jeng jong, lha phabep sunga chun phatchomna bei natoh eikipen,

lunggel gentheina dimset in jankho sot noijah genthei kathoh e.

4Jalkhun chungah kalumin, 'Itih tah le jingkah ahi tadem?' tin kagelji.

Ahinlah jan in eisu chol in khovah kahsen kaki peh le-le jin ahi.

5Ka tichung la than leh akhih in atom dim e.

Ka vun jong apohkeh gamin, anai lalong long'e.

Pathen Heng'a Job Kana

6“Ka nikho ho jong pon khong ho patphei kilham sangin agang joi.

Kinepna beijin akichaiji e.

7O Pathen, ka hinkho hi haikhat bep bou ahi ti nei geldoh peh in,

chule keiman kipana hi kanei kit louhel ding ahi.

8Nangin tua hi neimu ahin, ahinlah nei musot pon nate.

Nangin neiven natin, ahinlah keima ana chemang tange.

9Meilhang akithecheh a aman hel bangin,

athiho khu hung kile kit tapou vinte.

10Amaho chu ain uva pat tonsotna—

mukit tah lou dinga chemang ahi tauve.

11Keima thusei louvin kaum theipoi.

Kalung gentheina ho ka seidoh a ka lhagao genthei jeh a kiphin ding kahi.

12Keima hi twikhanglen'a kichat chat um ganhing len ahilouleh gullui kahia

nahonbit nanoija chu neikoi jeng ding ham?

13Keima, 'Ka lupna in eilhamon intin,

chule ka imut teng kanat gentheina ho olsah tante,' tin kagelin,

14ahinlah nangin mangse nei matsah jin

chule gaothil mu in nei kichat sah ji e.

15Hitia genthei thoh sang hin—

eikimehlih jeng hen lang thileng pha kasa joi.

16Ka hinkho kadei mon hitia hin-hin ding hi kadei tapoi.

O nikho lhomcha kanei sung hin ka changin nei dalha jengin.

17Mihem ho hi ipi hiuva, nangin hibanga hi na khohsah a,

chule nagel jing jeng ham? 1

18Ajeh chu nangin jingkah seh le nakhol chil soh in

chule phat jousen na patep jinge.

19Kachil valna ding phatsung beh a

ipi dinga nei dalhah lou ham?

20Chonset kanei ahileh, nang chunga ipi kabol khah ham?

O mihem te vejing pa?

Kei hi tup penna neisem ham?

Nanga dinga pohgih kahi ham?

21Ipi dinga ka chonsetna na ngaidam jeng louva

chule kathemmona ho nei lahmang peh lou ham?

Ajeh chu leivui lah a kijam a thivah ding kahitai.

Nangin hin ven natin, keima ana chemang tange.