Job 3

Job Thusei Masa

1Thilsoh hijat nung hin Job akamkan apen nikho agaosap tai. 1 2Job in aseijin,

3“Kapen nikho le keima mihem a kahung kijil na

jan chu chulmangin umhen.

4Hiche nikho chu muthim soh jeng hen,

Chung Pathen a ding jengin jong manghel hen,

chule khovah in salvah hihhel hen.

5Hiche nikho chu muthim khojinin kitom mang jeng hen.

Meivomin khu jeng hen,

chule muthim chun kichat tijat sah hen.

6Hiche jan chu nikho kisimna a kon'in kithaimang jeng hen,

kum sunga nikho kisimna a avellin kisimtha kit tahih hel hen,

lha kisimna holah a jong avellin hung kilang lut hihhen.

7Hiche jan chun nao neida hen.

Kipana jong neihih hen.

8Gaosapna lam'a them ho—

Leviathan suthou thei khop a gaosap them hon—

hiche ni chu gaosap uhen.

9Hiche nikho chule jingvalpa jong thim den hen.

Vah ding kinem hen lang ahinlah panna bei hihen lang;

jingkah khovah jong mu hihbeh hen.

10Kanu naobu khah louva anakoi nikho chu gaosap in umhen,

leiset gim gentheina jouse mu dinga eina pensah jeh chun.

11“Ipi jeh a athisa a kanapen louham?

Ipi dia naobu a konna kahung doh a chu kana thilou ham?

12Ibola kanu phei chunga chu eina kilup sah ham?

Ipi bolla kanun anoija eina vah ham?

13Kahung pen chun ana thiden leng, kei tua hi lungmong tading.

Keima ka imutna kicholdo tadinga.

14A insah sau thupi tah-tah panna beiya aum nung'a,

keima leiset lengho le prime minister ho toh kichol khom tadinga.

15Sana haotah le aleng inpiu dangka dimset,

leng chapa tetoh keima kichol khom tading.

16Athisa a peng chapang ho leh naosen khovah mukhalou ho,

banga eina kivui den lou ham?

17Thina a chun miphalou in hahsatna asosah tah lou jeh chun,

thachol jouse akicholdo tai.

18Thikhol khulla chun sohchang kihen ho jong,

angah a pangpa sapsetna aja tapouve.

19Mihao leh migenthei jong chuah aum khomun,

chule soh jong apupa a kon'in a ongthol tai.

20“Oh, ipi dinga migentheipa hi khovah kimusah a,

migenthei pa hi hinkho kipea ham?

21Thi ding angaicha lheh uvin ahinlah thina chu ahunglhung pon,

gou kiselguh sangin ngahlel tah in ahol un ahi. 2

22Gentheina jouse athoh chai uva athi tengu leh kipana adimset jiuvin,

lhankhuh amu tengu leh akipah jiuve.

23Ipi dinga akhonung ding neilou,

Pathen'in hahsatna dimsetna aumkhum ho chu hinkho kipeuva ham?

24Khoisatna dingin ka nethei pon,

kathoh hahsa ho hi twi bangin akisung lhai.

25Keiman ka kichat pen chu kachunga asoh e.

Ka kichat pen chu atah ahung hitai.

26Lungmon kanei pon, thipbeh cha umna kaneipoi.

Choldona kanei pon; hahsatna bou ahung ji e.”