Job 26

Job Thusei Kona: Bildad Adonbutna

1Hichun Job in thu aseikit in:

2“Thabei chu nangin iti na-na kithopi ham!

Atha lhasam chu iti naki thopi ham!

3Kangolna hi iti nahetdoh sah thei ding ham!

Ipi chihna chu neihil khah em?

4Hitobang chihna thusei ho hi hoiya nakilah ham?

Koi lhagaovin nanga konna thu asei ham?

5“Athisa—

twitonoija umho chu akithinge.

6Pathen masanga chun noimigam jong akeu ahi.

Manthahna mun chu akihol doh tai.

7Pathen'in van sahlang kai chu onghom laiya ahin khang doh in

chule leiset chu imacha umlouna ah akhaije.

8Aman go chu meilhang satah in atom in,

chule agih a chun apohkeh dehpoi.

9Aman lha chu amai atompeh in,

ameilhang ho a chun akhumin ahi.

10Aman leisetna konna twi achom khenna chu kolmong ana semdoh ahi.

Sun le jan gamgi asempeh ahi.

11Van khombul ho akiling in;

aman asapset teng akithing tuntun jin ahi.

12Ama thahat in twikhanglen thipchet in aum'e.

Athilbol theina in twikhanglen'a ganhing len chu asuhchip ahi.

13Alhagaova vanho hoitah a asem ahin,

chule athaneina a gulpi kilap le-le chu asutpai ahi.

14Athilbol ho lah a hiche ho hi akipatna mai-mai bou ahi nalaijin,

athilbol theina husa mai-mai bou ahi.

Kon, hitia chu, van kithin thahatna chu ahet thei ding ham?”