PATHEN LEKHABU THENG

Hosea 1

Hosea In Numei Kijoh Akichenpi

Pakaijin hiche thu hi Beeri chapa Hosea anapeh ahi. Hiche hi Uzziah, Jotham, Ahaz, chule Hezekiah ho Judah lenga anapanlaiyu chule Jehoash chapa Jeroboam Israel te lenga anapanlai ahi. 1 Hiche hi amasatah-a Pakaijin Israel mite kom'a Hosea anamanchaha thu anasei pat chu ahi. “Chenlang noti khat kichenpin, chutileh achate phabep khat noti cha-a hungkijil ding ahiuve. Hiche chun Israel chate Pakaiya konna akiheimanguva, gamchom mite milim doi ahou-u chun noti chonna achonna o chu avetsah ahi.” Hijeh chun Hosea in Diblaim chanu Gomer akichenpin ahile, chuin ahung gaiyin Hosea dingin chapa khat ahinpeh in ahi. Chule Pkaiyin aseijin, amin “Jezreel nasah ding ahi, ati, ajeh chu keiman phat chomkhat jouleh Jezreel thisan kiso jeh a Jehu lengpa alenggam talen kamat saha, Israel mite chamlhatna lenggam kasuhbei ding ahitai. 2 Hiche niteng chuleh Jezreel phaichama Israel galhatna kasuhbei ding ahi. Gangtah in Gomer in nao ahinvop kitin, chanu khat ahing kit in, chuin Pakaijin Hosea jaha aseikitin, nachanu hi amin, “Dipdamna-bei, ‘Ngailutna–bei’ (Lo- ruhamah) - ajeh chu keiman Israel mite hi kangailut tah louhel ding ahitai ahilou le ka ngaidam louding ahitai, ati. Ahinla Judah mite chunga kangailutna kavetsah ding, Pakai a Pathen'u thahatna jal'a kahuhdoh ding ahi, galhat mite gal manchah jeh, sakol le sakol kangtalai thahatna jeh hilouva Pakai a Pathen'u thahatna jal'a kajosah ding bou ahi.” Ngailutna beiyin anoichep aban phatin- Gomer in nao ahin vopkit in chapa ani channa ahing kittai. Pakaijin aseijin, “Amin chu-‘Kamite-hilou’ tin min sahin, ajeh chu Israel mite hi kamite ahitapouve, chule a Pathen'u jong kahi tapoi,” ati. Ahivanginla Israel chate twikhanglen panga neldijat le simjou lou hung hitei ding ahiuvin, ajah uva ‘kamite nahitapouve’ Katina laitah a chu “hingjing Pathen chate “Kati ding ahiuve. 3 Hitia chu Judah mite le Israel mite thakhatna hung kikhom kimsohkeiuva, alamkaidiu jong mihem khat seh akilhendiu gamsunga konna kitou tol ding ahiuve. Ajeh chu Jezreel nikho hi loupi ding ahiye.

Source notes (3)

Cross-reference 2 Lengte 15:1-7; 2 Thusimbu 26:1-23; 2 Lengte 15:32-38; 2 Thusimbu 27:1-8; 2 Lengte 16:1-20; 2 Thusimbu 28:1-27; 2 Lengte 18:1—20:21; 2 Thusimbu 29:1—32:33; 2 Lengte 14:23-29
Cross-reference 2 Lengte 10:11
Cross-reference Rm 9:26

PATHEN LEKHABU THENG. Copyright © 2020 Chongthu Bible Translation Team. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.