Daniel

DANIEL

THEMGAO LEKHABU

Daniel Themgao Lekhabu Sung Thu Umdan

Israel Pathen chu, Hatchungnung Lei leh Van sempa, chitin namtin jouse khonung leh khoma abon’a gongtoh’a umsah pa (thunun bolpa) Pathen ahi, ti kiphondohna ahi. Pathen chaten, Pathen hephalou lah a I-Pathen’u chu lhaso louva tuhdet ding, thichan hijongleh pandet ding, hichu Daniel leh aloi mithum ho hinkho’a muchetna leh phondohna ahi. Ama hon leng inpia neh leh don twitah ho neh sang’a, anche me (an neh theng) neh joh ding’a akitep nau, Lengpa sem milim ang’a kunlou ding, semthu pathen houna-a bohkhup louding’a akitep nau, thichan’a ding’a meilhum sung’a akiselut geiuva kitah-tah’a akipehdoh nau, hichu chidang namdang ho lah a Hatchungnung Pathen aloupina aphondoh nau ahi.

Chuin Nebuchadnezzar lengpa alunggimtan, agamsung’a doithemho, ailhim themho, ahsi lekhathem ho, michingho, abon'in akouvin, alunggimna aseijin, hinlah lengpa mang’a thutah kiselguh chu, koima ahedohthei aum tapouvin ahi. Hichu Pathen'in amipa Daniel mangchan, leiset miching mithem ho chu ajumson alosam sah in ahi. Pathen'in Daniel mangchaa khonung thil hunglhung ding ho, themgao thua aphondoh hin, Israel Pathen chu Hatchungnung ijakai hesoh, musoh chule Ama phasah’a ijakai umsahpa, akiphondohna ahi.

Daniel Themgao Lekhabu Kihop Khen Dan

Daniel lekhabu hi hopnia hopkhen thei ahi. Khatna, bung 1-6 sung hi, alhangpin khang thusim ahi. Hichea hin Daniel ama tah chu aseidohpa leh gaothu phongdohpa ahipon, ama chung chang thu ho akisun’e. Bung 1 sung’a Daniel hinkho thusim chomcha akimun, ama tah chu soh dinga gal hing’a, Babylon gam’a kikaimang ho lah a khat ahi akicheh’e. Bung 2-5 sung in, Daniel in Pathen atuhdet’a, Pathen'in Daniel chung’a athahat aloupina aphon’a, soh hita louva leng inpi thumop vaihom’a ahung pandoh thusim akiseiye. Aman Pathen’a kon chihna leh hetna jal’a, Nebuchadnezzar leh Belshazzar chung’a lhung ding ho ana ledoh’a, ana phondoh’a, mihon Pathen dihtah amudoh nau akisei jin, hiti chun kum sottah lengho inpia thumop vaihom in apang’e.

Nina – Bung 7-12 sung hin, Pathen'in Daniel jangkeija amanchah na akiseije. Daniel chu miho mang-ledoh pa, miho thilmu hilchenpa hita louvin, ama tah chu mang neipa leh gaothu seidoh pa, khonung thilsoh ding mumasa pa chuleh aphongdoh pa ahung hitai. Leiset khang thusim’a kikhelna lentah, Babylonte, Persiate, Greek te chuleh Romete leng vaipohna ahung dindoh’a anung lhuh kit diu chuleh ninunung’a leiset khang um ding thu, Pathen'in Daniel ana musahin, ana phondoh sahin ahi. Chuleh mihemte lenggam Messiah vaihomna atundoh ding ana phong doh in, vannoi miho ahetsah masat in ahi.

Lekhabu Jihpa Chule Akijih Kum

Daniel hi “Ka Pathen adih’a thutanpa,” tina ahi. Golhang khangdong cha ahipet in Judah gam’a Jehoiakim leng vaipoh kumthum lhinkum’a, Nebuchadnezzar lengpan Judah mi tamtah soh’ a gal hing’a akaimang ho lah a jao ahi. Judah mi leng phung’a mi ahitoh, ahetna le achihna chuleh amel-hoina jal chun, Babylon gam’a Nebuchadnezzar leng inpia vaipo ding kiholna a, ama leh aloi mithum: Shadrach, Meshach, Abednego chu lhendoh tamtah lah a apang un, lengpa inpia kijilna chom-chom kumthum sung anei sah un ahi. Imalam jousea, Daniel chun, midang ho akhokhel jeh in, lengpa inpia thumop vaihom in phat sotpi apangin, kum 60 val Babylon gam’a acheng den in ahi. Mi phabep in, hiche lekhabu hi, Daniel hilou midang khat sut hinte tia gelloi aum vang in, Bible Scholar atamjon kitoh tah in, Daniel sut ahimong’e tin pomdetna aneiyun ahi. Ajihna phatsung ahileh 6th century BC ahi.