2 Thusimbu 27

Judah Gam'a Jotham Vaihop

1Jotham chu kum somni le nga alhinin leng ahung changin Jerusalem'ah kum som le gup sungin vai ahom'in ahi. Anu chu Zadok chanu Jerusha ahi.

2Jotham in Pakai mitmun alunglhaina jeng ana bol'in ahi. Ahinlah apa bangin Hou-Insunga gimnamtui ana halpon ahi. Ahijeng vang'in mipi ho chu chonset bol ana chelha jingun ahi.

3Jotham hin Hou-In kelkot sahlang chu ana semphan chuleh Ophel mol a khopi bang akeh lenin ahi. 4Hiche ban a jong chun aman Judah molchunga jong khopi tamtah ana sadoh in ahi. Chuleh gammang lam a jong kulpi leh insang tamtah ana sadoh in ahi. 5Ama hin Ammon mite lengpa ana kisat pin ana jouvin ahi. Hichea kon'in Ammon miten kum thum sungin kai ho hi ana peuvin: Dangka pounds 7,500, suhlou chang atena 50,000, chule sakol chang atena 50,000 ahi.

6Jotham in kitahna neitah in Pakai Pathen thu ana ngaijin ahung hatdoh cheh jeng tan ahi.

7Jotham in avaihom sunga agalsatna, avaihom ahinkho sunga thilsoh jouse Judah Le Israel Lengte Lekhabua akijihlut sohkeijin ahi. 8Jotham chu leng ahung chan chun kum somni le nga alhing tan, aman kum gup sungin vai anahomin ahi. 9Ama athi phat in David khopia avuijun ahi. Achapa Ahaz apa khel'in leng achangin ahi.