THUPUALAKNA 5

Laibu le Tuuno

1Kumpi tokhum tungah a to pa i a ziatsang khut sungah, a sung le a nungsang ah lai ki at a, ceptena sali a ki khen laibu ka mu hi.

2Hi laibu le ceptena te hong tu in kua kilawm ziam? ci in a thahat vantungmi khat a tai kawm in aw ngingtak taw a au ka mu hi.

3Vantung ah ahizong, leitung ah ahizong, leinuai ah ahizong, laibu a hong thei tu mihing om ngawl a, a en thei tu beakzong om ngawl hi.

4Tabang in laibu hong tu, a sim tu le a en tu a kilawm mihing mu ngawl ahikom, nasiatak in ka kap hi.

5Upa te sung pan khat in, kap heak in: en in, Judah minam te i Tawpi le David i zungpi in laibu le ceptena sali te hong tu in zawna nga zo hi, hong ci hi.

6Ka en a, kumpi tokhum, nganhing li le upa te i laizang ah a ki that Tuuno bang khat a ding ka mu hi, tua Tuuno in kii sali le mit sali nei a, tuate sia leitung theampo ah Pathian i sawl Thaa sali te a hi uh hi.

7Ama hongpai a kumpi tokhum tungah a to pa i ziatsang khutsung pan in laibu sia la hi.

8Laibu a lak zawkciang in, nganhing li le upa kul le li te sia Tuuno mai ah bok uh hi, khatsim in tengtong te le mithiangtho te thungetna ngimnamtui taw a kidim kham kuang te nei tek uh hi.

9Amate in la thak dawngkhat sia hibang in sa khawm uh hi, laibu a la tu le ceptena te a hong tu in na kilawm hi: banghangziam cile nangma sia thalupna thuak in na thisan taw nam sim, kampau namsim, minam sim le ngam sim sung pan in Pathian atu in nong tan zo hi;

10Taciang Pathian tungah kumpi le thiampi te in nong vawt zo hi: taciang leitung ah i uk tu hi, ci hi.

11Ka en a, kumpi tokhum, nganhing te le upa te kimkot ah vantungmi tampi te aw ka za hi: tua vantungmi te phakza sia tulsawm a se tul sawm le tul tampi a se tul tampi a hihi;

12A ki thatlum Tuuno sia vangletna, hauna, ciimna, thahatna, upatna, minthanna le thupha sang tu kilawm hi, ci in aw ngingtak taw ci uh hi.

13Vantung le leitung a omte ahizong, lei nuai le tuipi sung a om, a bitphuana te theampo in, thupha, upatna, minthanna le vangletna te theampo kumpi tokhum tungah a to pa le Tuuno tung ah, om tawntung tahen, a ci ka za hi.

14Nganhing li te in, Amen, ci uhhi. Taciang upa kul le li te in zong a nungta tawntung pa sia kun in bia uh hi.