Solomon Cueihnah 19

Carhaek Tuili

1Tedae lailak rhoek tah lungma ti kolla, a bawtnah hil thintoek neh a muk.

2Metlae, na pilnam a caeh hamla amamih loh a paek tih, tokrhat la amih a tueih dae, lungpuei a hoi tih amih te a hloem.

3Nguekcoineh pitpom la om li tih, hlang duek phuel te rhaengsae li vaengah, anglat kah oltloeknah loh a kae. Te dongah caeham la a hloep tih a cahoeh te, rhalyong bangla a hloem uh.

4Amamih kah a hmailong a khat nah tueng tih, metla aka thoeng khaw hilh ham a saii, Amih kah phaepnah a vawt rhoek soah dantatnah aka bae sak ham ni.

5Te dongah na pilnam long tah kopoekrhai yincaehnah a ming vaengah, amih (Egypt) rhoek tah dueknah a tloe neh hum uh.

Pathen Loh A Pilnam A Hoihaeng

6Suentae boeih kah a coengnah tah a thai la a hlinsai coeng, na olpaek a vai uh te khaw, na ca rhoek sading la aka hoeptlang ham ni.

7Khohmai loh rhaehhmuen a thing te tueng coeng, Tui a painah te khaw lai phuei la poeh coeng. Carhaek Tuili te longpuei khui coeng tih, Tuiphu a thoh nah khaw kolvan rhamhing la poeh coeng.

8Na kut neh a hoeptlangnah ah tah namtu pakhat la a pah uh, khopoekrhai khobaerhambae a dan hnuk ah tah.

9Amih te marhang bangla soi uh tih, tuca bangla rhetlo uh pai. Amih aka khang Boeipa nang te n'koeh pai saeh.

10Amamih kah lampah nah kawng a thoelh uh pueng, Rhamsa yuengla diklai loh pildik a thoeng sak tih, Nga yuengla tuiva loh bukak a pul sak.

11A hue a bawt tih buh tui caak ham a bih vaengah vaa a thai la a hmuh uh.

12Amih bomnah paek hamla tuili tanghuem a thoeng pah.

Egypt Sokah Dantatnah

13Lamhma kah miknoek la rhaek a daeh muehla, hlang tholh soah dantatnah a pai moenih. Khoboe a halang bangla a yook uh tih, yinlai te a thiinah uh khahing aih la kho a boe uh dongah.

14A tloe rhoek loh amih taengla aka cet hlanglak te doe ham a aal uh tih, amamih a hoeikhangnah koi yinlai te sal a khueh uh.

15Te bueng pawt dae ni, lamhma soah dantatnah a pai li vaengah tah yinlai khaw moeihoeih la a doe uh.

16A hnuk lamtah khotue neh umponah neh a doe lamhma te khaw rhihom la patangnah neh a phaep uh. Amih te hamsum khaw a cut hmai van dae ta.

17Amih te mik hmaang ne a ngawn coeng, hlang dueng thohka kah aka om rhoek bangla, khohmuep, khohmu loh a thing vaengah tah,

longpuei hmuh hamla a thoka te boeih a yam uh.

Coengnah Lamloh Rhoeprhuinah

18Hmuen a tloe la a khueh vaengah a hno khaw thovael uh. rhotoeng ol bangla a coengnah loh ol rhoepsaep a thoeng sak. A ol khaw amah hmuen neh rhip a caeh vaengah te.

19Lan kah rhamsa te tuidongkah mulhing la a poeh vaengah, mulhing khaw lan ah yuel uh van bal.

20Hmai khaw tui dongah a thaomnah a tueng vaengah tah, a coengnah loh hmai a thih thai te tui loh a hnilh.

21A tloengtlaih la hmai a rhong pawt vaengah tah, aka poci thai mulhing pumsa khaw a soah cet tih, yoeikoek la aka yut vaan kah buh khal khaw yut sak thai pawh.

Olbawtnah

22Boeipa aw, a cungkuem dongah nang n'pomsang dongah, na pilnam he thangpom lah. Amih te a tue boeih neh a hmuen boeih ah bom hamla na hnoel rhoeng moenih.