Solomon Cueihnah 17

Egypt Ramkah Khoyin Mueirhih

1Na laitloeknah tah len tih thui ham khaw kuel, te dongah hlahpham hinglu tah longhmang la cet.

2Lailak pilnam long tah a thaomnah dongah, namtu hlangcim ka pai sak ni a ti, Amamih tah a hmuep kah tamna neh,

khoyin kah thongtla la puet yalh uh. Imphu hmuiah a tlaeng uh tih, kumhal kah khokhannah lamloh a sol uh.

3hnilhmanah baiyan khup hmuiah ah, a huep la a tholh uh te phoe kek pawh a ti uh. Tedae mih te a rhih la hueknah loh a haeh uh tih, a hmuhnah khaw hmaang coeng.

4A imkhui kah a khui long pataeng amih te, rhihnah lamloh a hoeptlang moenih. Amih taengah mueirhih ol a lo pah tih, yoethae a painah te maelhmai hmueprhut la a thoeng pah.

5Rhihom khoyin te tah hmai thaa long khaw vangnah paek ham noeng pawt tih, aisi hmai long khaw vang sak ham, a aa sak thai moenih.

6Amah a hlup nah neh, lakuengnah mueh atah, amih ham khosae a om moenih. A hmuh uh hno te khaw mueirhih khuiah tah a hmuep pah tih, a suisak hmuh pawt lakah khaw thae ngai.

7Hlangbi kah a cueinah khaw tlayae la yalh tih, a cueinah neh a hoem khaw rhaprhap a ho pah.

8Satlo hinglu kah a rhihnah neh caivaelnah haek hamla ol aka khueh khaw, amamih te nueihthaboep la rhihnah ne a satlo uh.

9Amih te rhinah loh hih pawt dae, khohong rhamsa kah a caeh neh, rhul colh ol loh a huek.

10Rhinah dongah a thuen neh mitmoeng uh tih, khohli pataeng sawt a rhih uh. Te te a rhael hamla coeng pawt dae ta.

11Rhalyawpnah hno tah a vawtnah coeng tih, amah kah laipailoh amah a boe sak. A mingcimnah loh ngai a hmang sak tih,

a rhainah khaw a pungtai pah yoeyah.

12Rhihnah he a hong pawn ni, poeknah lamloh aka thoeng bomnah te a toeng sak.

13Kotak kah vawtnah loh ngaiuepnah a muei sak tih, phaepnah a kung te vapsa la a poek.

14Tedae khoyin puet thabawtnah neh rhep om coeng, Te tah saelkhui kah thabawnah lamloh amih soah pai. Amih tah a ih hmuen la boeih boeih ip uh coeng.

15Mikhlam ah tuihnam loh a vai uh coeng tih, a hinglu dongkah kobawtnah loh a yui sak uh coeng. Amih te rhihnah loh buengrhuet a thing koeloe dongah.

16Te kah aka om boeih tah cungku uh coeng tih, thicung neh a saii mueh thongim ah khoep a tlaeng uh.

17Amih te lotawn neh tudawn la a om akhaw, khohong kah aka bong bibikung rhoek khaw, A tuuk coeng dongah a yoethaenah khaw koe coeng, amih te a hmuep kah thirhui neh boeih a khih coeng.

18Khohli ol aka lo long khaw, thingbu dongkah suva a loeihnah ol long khaw, tui pung aka long ol long khaw,

19Lungpang aka tim rhup long khaw, hmuh mueh rham a soi a pet long khaw, satlung sathang kah a kawk ol long khaw, Tlang kah thaelvap olhum hnuk long khaw, amih te mueirhih neh a hit sak.

20Diklai pum he vangnah khosae neh a tue coeng dognah, a bibi a tomta mueh la cet pawn ni.

21Te pilnam sokah mueirhih tamyin lah yaal coeng coeng, A hmuep kah mueimae loh amih a pha maerhae pawn ni. Tedae amamih te amamih taengah a hmuep lakah rhih ngai pueng.