Solomon Cueihnah 10

Adam lamloh Moses taengah Bibinah

1Diklai kah a napa a hlinasai tih amah bueng a suen vaengah Cueihnah loh a hoep a tlang. Amah loh anih te longphaelnah lam a hoihaeng

2A cungkuem te uktaem hamla thaomnah a paek bal.

3Aka dueng pawt hlang tah anih taeng lamloh a thintoek neh nong, A manuca a ngawn dongah amah kosi ah poci coeng.

4Anih rhangneh diklai khaw a li coeng dae cueihnah loh a khang, Hlangdueng tah thing ngawn hmawn oi nen khaw a hoihaeng bal.

5Namtom he halangnah khuiah soekloeknah om ham kotluepnah a khueh vaengah Cueihnah loh hlang dueng a hmat tih, Pathen hmaiah hlang cim la a khueh, A ca ham thinphoeinah ham a hmai ah a thaomnah he a khoem.

6Lailak rhoek te a poci vaengah cueihnah loh Hlang dueng te a hlawt tih, Khopuei panga hmai loh a tlak thil vaengah a loeih sak.

7Amih kah halang neh a mingphanah tah om pueng tih, Khopong te phat khu pueng. Aka tangnah mueh hinglu thoelhnah te lungkaeh tung la om

8Hnothen hmatnah lamloh a kang bueng kolla, a anglatnah te hlanghing kah a poekkoep la a khueh uh. Te dongah amih a tlaknah te poek muehla om mahpawh.

9Amah aka bong tah cueihnah loh ngaihmangnah lamkah a hlawt.

10Hlang dueng tah a manca kah thintoek lamloh yong dae, cueihnah loh long dueng a tueng. Anih te Pathen kah ram a hmuh sak tih, Hno cim mingnah a paek bal. A bibi khaw a song sak tih, a thatloh kah a thaih khaw a rhoeng sak.

11Anih aka hnaep rhoek loh uet cakhaw, Anih te cueihnah loh a pai puei dongah boei la a khueh.

12A thunkha taeng lamloh a hoeptlang tih, Anih aka rhungngol thil rhoek taeng lamloh sading la a khoem. Rhainah neh a thingthuel vaengah tanah a paek tih, hingcimnah tah a tloe boeih lakah tlung ngai tila a ming.

13Hlang dueng te yoi uh mai cakhaw, Cueihnah loh anih a phap pawt dongah, tangrhom khuiah khaw anih te a om puei.

14Thongim ah a om vaengah khaw, Ram kah mancai dongla a khuen hil hlah sut pawt tih, A boei rhoek soah uknah a paek. Anih aka paelnaeh rhoek te a tholh a hmuh sak tih, kumhal kah thangpomnah a paek.

Egypt lamkah Khaw Cueihnah Loh A Loeih Sak

15Pilnam cim neh cuemhmuet koca khaw, cueihnah loh namtom kah hnaemtaeknah lamloh a loeih sak.

16Cueihnah loh Boeipa sal kah hinglu te a kun thil tih, boethae manghai khaw khobaerhambae miknoek neh a mah.

17Pilnam hlangcim tah a bibi dongkah thaphu te a paek tih, kopoekrhai longpuei ah amih te a hoihaeng. Khothaih ah amih ham hlipyingnah la om tih, Khoyin ah khaw hmai tung la om.

18Cirhaek Tuili te a kat puei tih, Tui a dung ah khaw amih te a mawt.

19A thunkha rhoek te buek uh mai cakhaw, Amih tah tupuei a dungnah lamloh a samoe sak.

20Te dongah lailak he hlangdueng loh a poelyoe coeng. Aw Boeipa, naming cim te laa sak uh pai saeh, Na tungaepnah kut te hut at la koeh pai saeh.

21Cueihnah loh olmueh kah a ka a ong pah tih, Camoe kah hmuilai khaw cimphan la a cal sak.