Solomon 7

1Na kho te hlangcong canu kah

khokhom neh sawtthen tangkik.

Na phai dongkah phaibong khaw

kutthai kut kah bibi neh himbai bangla om.

2Na yenrhui te kueluek baeldung bangla

homtui long khaw vaitah pawh.

Na bungko te khaw tuilipai loh cang hlom neh a ven.

3Na rhangsuk rhoi tah

sakhi rhuinu caphae ca rhoi van pawn ni.

4Na rhawn tah rhaltoeng vueino van pawn ni.

Na mik tah Bathrabbim vongka kah

Heshbon tuibuem van pawn ni.

Na hnarhong tah Damasku rhaldan aka tawt

Lebanon rhaltoengim van pawn ni.

5Na sokah na lu tah Karmel tlang van pawn ni.

Na lu samloeng tah manghai sammuei,

daidi samdueng van pawn ni.

6Lungnah, omthenbawnnah neh

sawtthen tangkik tih hmae tangkik.

7Na sang loh rhophoe a puet tih

na rhangsuk loh thaihsu coeng he.

8“Rhophoe dongah ka yoeng saeh lamtah

a koi te ka hlan eh,’ ka ti.

Na rhangsuk tah misur thaihsu bangla om laeh saeh.

Na hnarhong hmueih tah thaihthawn van pawn ni.

9Na ka tah misurtui then van pawn ni.

Oila

Kamah hlo taengah caeh vaengah no neh

lai khaw vanat la khuep uh.

10Kamah he kamah hlo kah coeng tih

a lungdueknah tah kamah ham saeh.

Tongpang te Lungnah a Paek

11Kamah hlo aw halo lamtah pong la cet lah sih,

vangca ah khaw rhaeh mai sih.

12Thoo sih, misurdum te so sih.

Misur khaw a cuen khaming,

thaihmoe loh culh tih tale khaw khooi coeng.

Teah te kamah hlo te nang taengah kam pae eh.

13Hloih he a bo rhim.

Tedae mah kah thohka ah

cangtham he a rhuem a thai la cungkuem tih

ka hlo nang ham ka khoem.