Baibal Olcim
Tingtoeng 78
Israel Hnuksul
Asaph kah Hlohlai
Ka pilnam aw ka olkhueng he hnatun uh lah. Ka ka lamkah olthui dongah na hna hooi uh lah. 1
Hlamat lamkah olkael te ka ka dongkah neh ka ong vetih ka thaa dae ni.
Tekah te n'yaak uh tih m'ming uh vanbangl a a pa rhoek loh mamih taengah han thui uh.
BOEIPA koehnah, a tlungalnah neh khobaerhambae a saii te, aka thui rhoek loh a ca rhoek lamkah hmailong cadilcahma taengah khaw phah uh boel sih.
Jakob ham laipainah a khueng tih Israel dongah olkhueng la a ling te ni a ca rhoek taengah patoeng ming sak ham a pa rhoek a uen.
Te daengah ni caldilcahma loh a ming uh eh. Hmailong ah a cun camoe rhoek long khaw a thoh uh puei vetih a ca rhoek taengah a tae pa eh.
Te vaengah a uepnah khaw Pathen pum ah a khueh uh vetih Pathen kah khoboe te hnilh uh mah pawh. A olpaek khaw a kueinah uh.
A napa rhoek bangla thinthah neh hlang koek cadil, a lungbuei aka cikngae pawt tih a mueihla loh Pathen aka tangnah mueh cadil la om uh pawt sue.
Liv a aka muk tih aka kaap Ephraim ca rhoek khaw caemrhal tue vaengah a hnuk la bung uh.
Pathen kah paipi te ngaithuen uh pawt tih a olkhueng neh pongpa ham khaw a aal uh.
Te dongah amah kah bibi neh khobaerhambae amih a tueng te a hnilh uh. 2
Egypt kho Zoan hmuen kah a napa rhoek mikhmuh ah khobaerhambae a saii pah. 3
Tuitunli te a phih pah tih amih a kat puei vaengah tui khaw som bangla pai. 4
Te phoeiah amih te khothaih ah cingmai neh khoyin puet te hmai vang neh a mawt.
Khosoek ah lungpang rhoek te a hep pah tih tuidung bangla muep a tul. 5
Thaelpang khuikah tuicip a thoeng sak tih tuiva tui bangla a hlawn.
Tedae rhamrhae ah Khohni te a koek uh tih a taengah tholh ham koep a koei uh. 6
Amih kah hinglu dongah caak a hoe uh te khaw a thinko neh Pathen ni a noemcai uh.
Pathen taengah khaw, “Khosoek khuiah caboei phaih ham Pathen te coeng thai aya?
Lungpang a boh tih tui a phuet vaengah soklong la long coeng ke. A pilnam ham buh khaw a paek thai vetih maeh a tael pah venim?,” a ti uh tih a thui uh.
BOEIPA loh a yaak vaengah a paan tih Jakob te hmai neh a kolh. Israel taengah khaw thintoek a khuen bal.
Pathen te tangnah uh pawt tih Boeipa kah khangnah dongah a pangtung uh pawt dongah ni.
Tedae a sokah khomong te a uen tih vaan thohkhaih rhoi te a ong. 7
Te dongah amih kah a cak ham manna a tlan sak tih amih te vaan cangpai a paek.
Hlang loh rhaelnu buh a caak tih lampu khaw amih ham kodam la a thak pah.
Vaan lamkah kanghawn a hlah tih a sarhi neh tuithim yilh khaw a thawn.
Te dongah maeh loh laipi bangla, vaa mul long khaw tuitunli kah laivin bangla amih soah tlan tih,
a dap kaepvai kah a lambong lakli ah a hlak pah.
Te dongah a caak uh tih muep cung uh. Amih kah ngaihlihnah vanbangla amih te a paek.
A ka dongah caak a paem uh pueng akhaw amamih kah hoehhamnah te kholong uh tak pawh.
Te dongah Pathen thintoek amih taengla pai. Te vaengah amih khuikah thaomthathueng rhoek te a ngawn tih Israel cadongcaloe rhoek te a tulh.
Te boeih khui lamkah tholh uh bal pueng tih Boeipa kah khobaerhambae te tangnah uh pawh.
Te dongah amih kah khohnin loh a honghi la, a kum khaw lungmitnah neh thok.
Amih te a ngawn van daengah ni Boeipa te a tlap uh. Mael uh tih Pathen a toem uh.
Te daengah amih kah lungpang Pathen neh amih aka tlan Khohni Pathen te a ngaidam uh.
Tedae amah te a ka neh a hloih uh tih a lai neh a taengah laithae uh. 8
Amih kah lungbuei te khaw Boeipa taengah hong pawt tih a paipi te tangnah uh pawh.
A thinphoei lothaesainah khaw a dawth tih amih te phae pawh. Te dongah a thintoek khaw puet a hnop tih a kosi khaw boeih sah pawh.
Amih te pumsa lah om tih yilh loh a khum phoeiah ha mael pawt te khaw a poek.
Khosoek ah Boeipa mat a koek uh vanbangla khopong ah Boeipa te a noih uh.
Te dongah Pathen te koekthoek a noemcai uh tih Israel kah hlang Cim te a phen uh.
Rhal khui lamkah Boeipa kut loh amih a lat khohnin te poek uh pawh.
Amah kah miknoek te Egypt ah, kopoekrhai hno khaw Zoan hmuen ah a tueng sak. 9
A sokko khaw thii la a poeh sak tih tuicip kangna khaw o uh thai pawh. 10
Amih aka yok ham pil neh amih aka phae ham bukak khaw a hlah pah. 11
A cangthaih te phol taengla, a thaphu khaw kaisih taengla a paek pah. 12
Amih kah misur te rhael neh, a thaihae khaw tlansing neh a ngawn pah.
A rhamsa te rhael taengla, a boiva khaw rhaekhmai taengla a uup pah.
A thintoek thinsa kah a thinpom khaw, yoethae puencawn rhoi at kah kosi neh citcai te khaw amih taengah a sah.
A thintoek ham a hawn a saelh coeng. Amih kah hinglu te dueknah lamkah khaw hnaih pawh. Te dongah a hingnah te duektahaw taengla a paek pah. 13
Egypt kah caming boeih neh Ham dap kah thahuem tanglue te a ngawn pah. 14
Tedae a pilnam te boiva bangla a khuen tih khosoek khuiah tuping bangla a hmaithawn. 15
Amih te ngaikhuek la a mawt tih rhih uh pawt dae a thunkha rhoek te tuitunli loh a khuk. 16
Te dongah amah kah bantang kut neh a men tlang cim khorhi la amih te a khuen. 17
Namtom rhoek te amih hmai lamkah a haek pah tih rho la rhilong te a suem pah. Te dongah Israel koca loh amih kah dap ah kho a sak uh. 18
Tedae Khohni Pathen te a noemcai uh tih a koek uh, a olphong khaw khoem uh pawh.
A napa rhoek bangla balkhong uh tih hnukpoh uh. Lii a pawl la poeh uh.
A hmuensang neh Boeipa a veet uh tih a mueidaep neh a thatlai sak uh.
Pathen loh a yaak vaengah lungoe tih Israel te rhep a hnawt. 19
Te dongah Shiloh pohmuen neh hlang lakli kah a khueh dap te a phap sut. 20
A sarhi te tamna la, a thangpomnah khaw rhal kut khuila a paek pah.
A pilnam te cunghang taengla a tloeng tih a rho taengah khaw lungoe.
Tongpang rhoek te hmai loh a hlawp dongah oila rhoek thangthen uh pawh.
A khosoih rhoek te cunghang dongah cungku uh tih a nuhmai rhoek khaw rhap uh pawh.
Te vaengah Boeipa loh aka ip muelh bangla, misurtui neh aka tamhoe hlangrhalh bangla haenghang.
A rhal rhoek te tloep a tloek tih amih te kumhal kokhahnah la a khueh.
Joseph kah dap khaw a hnawt tih Ephraim kah mancai te a tuek tloe moenih.
Tedae a lungnah Zion tlang kah Judah mancai te a tuek.
Te dongah a rhokso te a sang la a sak tih kumhal due diklai bangla a suen. 21
A sal David te a tuek dongah boiva vongup lamkah a loh.
A pilnam Jakob neh a rho Israel te luem puei ham ni anih te cacun hnuk lamkah a khuen.
Te dongah a thinko neh amih te a luem puei tih, a kut kah a lungcuei neh a mawt.
Source notes (21)
- Cross-reference Mat 13. 35.
- Cross-reference Sng 7. 8—12. 32.
- Cross-reference Sng 14. 21,22.
- Cross-reference Sng 13. 21,22.
- Cross-reference Sng 17. 1-7; Lmp 20. 2-13.
- Cross-reference Sng 16. 2-15; Lmp 11. 4-23,31-35.
- Cross-reference Jhn 6. 31.
- Cross-reference Clt 8. 21.
- Cross-reference Sng 7. 17-21.
- Cross-reference Sng 8. 20-24; Sng 8. 1-6.
- Cross-reference Sng 10. 12-15.
- Cross-reference Sng 9. 22-25.
- Cross-reference Sng 12. 29.
- Cross-reference Sng 13. 17-22.
- Cross-reference Sng 14. 26-28.
- Cross-reference Sng 15. 17; Jos 3. 14-17.
- Cross-reference Jos 11. 16-23.
- Cross-reference Ltk 2. 11-15.
- Cross-reference Jos 18. 1; Jer 7. 12-14; 26. 6.
- Cross-reference 1Sa 4. 4-22.
- Cross-reference 1Sa 16. 11,12; 2Sa 7. 8; 1Kh 17. 7.
Baibal Olcim. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.