Baibal Olcim
Tingtoeng 48
Zion Thangpomnah
Korah ca rhoek kah tingtoeng laa
BOEIPA tah len tih a tlang cim kah Pathen khopuei ah a sang la thangthen ham tueng. 1
Diklai pum kah a omthennah hmuensang Zion tlang tah a sakthen pai. Tlangpuei tlanghlaep te Manghai Puei kah khorha la om.
Te khopuei kah impuei ah Pathen amah te imsang la ha tueng.
Manghai rhoek loh tuentah uh thae tih tun khong uh ke.
Amih loh a hmuh uh vaengahngaihmang neh let uh tangkhuet tih tamto uh.
Amih te thuennah loh cacun bungtloh bangla pahoi a phatawt.
Khothoeng yilh neh Tarshish sangpho te na phae.
Mamih loh n'yaak uh vanbangla caempuei BOEIPA kah khopuei te m'hmuh uh van coeng. Mamih kah Pathen khopuei te Pathen amah loh kumhal la a thoh ni. Selah
Na bawkim khui ah Pathen namah kah sitlohnah te ka poek uh.
Pathen namah ming bangla nang koehnah long khaw kho bawt duela boeih a pha tih na bantang kut ah duengnah soep.
Namah kah laitloeknah dongah Zion tlang loh a kohoe tih Judah nu rhoek khaw omngaih uh.
Zion ke hil lamtah vael lah. A rhaltoengim rhoek te tae lah.
A rhalmahvong te na lungbuei ah kuem lah. Anih kah impuei te hmailong kah cadilcahma taengah na thui ham khaw hil lah.
Ba dongah tikoinih tekah Pathen te kumhal ah mamih kah Pathen la om yoeyah. Amah loh duek duela mamih m'hmaithawn bitni.
Source notes (1)
- Cross-reference Mat 5. 35.
Baibal Olcim. Public domain. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · SourceEdition imported 2026-10-25.