Esther (Greek) 6

Manghai Lamloh Mordekai Thangpomnah

1Te khoyin ah Boeipa loh manghai kah a ihnah te vik a loh pah. Te dongah a cadaek te, “Hnin takuem kah cabu te lo lamtah kai hamla tae lah,” a ti nah. 2Te vaengah manghai Artaxerxes aka tawt hlueikhu rhoi loh ngawn ham a taeng neh Mordekai kawng a daek te a hm uh. 3Te dongah manghai loh, “Mordekai he mebang thangpomnah neh hinyahnah lae m'paek coeng,” a ti nah.

4Manghai loh Mordekai kah lungbuei a cim kawng te a dawt li vaengah Haman khaw vongup ah om. Te dongah manghai loh, “Vongup ah ulae aka om,” a ti nah. Te vaengah Haman te cet tih Mordekai kui-ok sak ham kui-ok rhui a sui te thui pah hamla cai.

5A sal loh manghai te, “Vongup ah Haman pai ke,” a ti nah hatah

manghai loh, “Anih te khue lah,” a ti nah.

6Te phoeiah manghai loh Haman te, “Thangpom ham ka ngaih hlang ham te metlam ka saii eh,” a ti nah.

Te vaengah Haman loh amah te, “Manghai loh kai lakah u lae a thangpom pueng eh?” a ti.

7Te dongah manghai te, “Manghai loh thangpom a ngaih hlang ham tah, 8manghai kah sal rhoek loh himai bol a then, manghai kah a bai van te khuen pah saeh, manghai kah a ngolnah marhang dongah te lo saeh. 9Te te manghai loh a thangpom a paya rhoek taengla pae saeh. Himbai khaw manghai loh a lungnah hlang te bai sak saeh lamtah anih te marhang dongah ngol sak saeh. Khopuei toltung ah doek saeh lamtah, ‘Manghai loh a thangpom boeih taengah tah he tlam eh saii pai saeh,’ tila pang saeh,” a ti nah.

10Te dongah manghai loh Haman te, “Poeknah a thenkoek la na khueh coeng te. Na thui bangla vongup ah bi aka bi Judah hoel Mordekai ham saii pah,” a ti nah.

11Te dongah Haman loh himbai neh marhang te loh. Himabi te Mordekai a bai sak tih khopuei toltung ah a ngol sak. Te phoeiah, “Manghai loh thangpom ham a ngaih boeih ham tah he tlam he saii pai saeh,” tila pang.

12Te phoeiah Mordekai te vongup la koep mael. Tedae Haman tah amah im la koe mael tih a rhungrhah neh a lu a muei. 13Metla a cugku te khaw Haman loh a yuu Zosara neh a hui rhoek taengah a thui.

A hui rhoek neh a yuu loh amah te, “Mordekai he Judah hlang koinih a mikhmuh ah na yawk pawn ni. Rhep rhoe na cungku ni. Namah na tungaep tloel ni, aka hing Pathen loh anih a om puei,” a ti nah.

Esther kah Buhkoknah neh Haman

14A thui uh li vaengah hlueikhu boei ha pai tih Haman te Esther kah a saii bohkoknah la tlek a khuen.