Baruch 6

1Jerusalem aw kothaenah neh ngaihmangnah himbai te pit laeh. Pathen taengkah thangpom mueithen te bai yoeyah laeh. 2Pathen lamkah aka loh duengnah himbai te bai laeh, Na lu dongah dungyan thangpomnah rhuisam te khuem laeh. 3Pathen loh vaan hmui boeih ah na rhuepomnah a tueng sak ni. 4“Duengnah, Rhalmongnah, Pathen Thangpomnah,” tila ming tanglue te Pathen loh m'paek pawn ni. 5Jerusalem aw tho laeh, Hmuen sang ah pai lamtah khcuk he dan laeh. Na ca rhoek tah khocuk khotlak lamkah tingtun coeng ke, A Cim Pathen kah ol van bangla, Pathen loh amih a thoelh dongah omngaih laeh. 6Amih te rhal loh a khuen tih, a khotling la cet uh coeng dae, Pathen loh nang taengla koep hang khuen ni, boei ngolkhoel dongkah bangla thangpomnah neh a khueh. 7Pathen loh tlang sang boeih neh, dungyan molmae te khaw hlak hamla. Solong te boeih hnil tih, lairhi ah vandaep om sak ol a paek coeng. Te daengah ni Israel te Pathen kah thangpomnah khuiah sading la a caeh thai pai eh. 8Thing neh botui thing boeih khaw, Pathen olpaek bangla Israel te hlipdah saeh. 9Pathen loh Israel te omngaihnah neh, thangpomnah khosae then ah, Amah taeng lamkah duengnah, sitlohnah neh a mawt pawn ni.